ladino  

 
Judeo espanyol
Contador:

Inicio >> Kantadores en Ladino >> S >> Shemuel Azriel Behar - Baritón
 
 

Kantadores de la tradisión djudeo-espanyola
Shemuel Azriel Behar - Baritón
(Plovdiv, Bulgaría)

Shemuel Azriel Behar nasió en Plovdiv, Bulgaría. Eskapó la eskola kon notas ekselentes en el 1969 i fu resivido en la Universidad "Iv. P. Pavlov" a estudiar medisina. Ayá se graduó kon onor i después lavoró komo jinekolog por un sierto periodo de tiempo. A la fin del 1977 fue admitido en la Akademia "Pancho Vladigerov" en Sofia. Su entrenador vokal ayá fue el Prof. R. Koleva, i él estudió intepretasión de múzika de kámera debasho de Irina Schtiglich. En el 1981 Shemuel Behar se graduó i empesó el master de dos anyos en múzika de kámera i de oratoria. Durante este tiempo él ya tomó parte en 17 performansias de óperas, en 3 rolos diferentes - de Mendelssohn, Donizetti i Gluck i kantó a solo en dos konsertos de kanto a solo. En el 1983 resivió un kontrato de artista solista en la Opera de Estado en Plovdiv i kantó en la óperas "Don Carlos", "L'Italiana in Algeri", "Pagliacci", "La cambiale di matrimonio", "Andrea Chenier", "La Boheme" i mas. El lavoró ayá asta el 1990.

En el 1984 en el "Winter Music Festival" (El Festival de Múzika de Invierno) Shemuel Behar aparesió komo envitado spesial en el "Faust" de Schumann debasho del maestro Dobrin Petkov – kon la enrejistrasión en el Golden Fund de la Radio Nasional Bulgara. Kuatro anyos mas tadre tuvo lugar la premiera mondial i la enrejistrasión en studio de un CD, komisionado por las Nasiones Unidas: "Mankind – siglo XX" de Ivan Spasov. En el djulio del 1987 enrejistró kantes sefaradís de los Balkanes para la Televizión de Madrid. En el 1988 izo su primer tur de konsertos en Almania – Manheim, Darmstadt i Neckarhausen. A la fin del 1990 Shemuel Behar izo un kontrato en Czechoslovakia komo artista solista, i ay kantó en las óperas mas famozas, de la "Traviata" a la "Aida", del "Nabucco" al "Otello", debasho de varios direktores de orkestra de todo el mundo.

En el mizmo tiempo Shemuel Behar lavoró komo asistente direktor de shena en varias operas, i fue konsultante de produksión en italiano. Además kantó las "Carmina Burana", el "Te Deum Laudamus" de Dvorak i mas, i enrejistró lavoros de kantata oratorial i ovras de kompozitores de múzika bulgaros. En el 2001 él enrejistró, entre varios CDs, el DVD "Komo la roza" de kantes sefaradís. Después del 2003 tomó parte a konsertos en Olanda, Almania, Polonia i la Repúblika Czecha. Su último konserto a solo en el 2008 en Sofia i Plovdiv, tuvo un grande sukseso.

Shmuel Behar avla bulgaro, italiano, espanyol, fransés, almán, czeko i ruso. Del prinsipio de su karriera él lavoró komo entrenador vokal i ambezó la interpretasión a munchos estudiantes de todo el mundo. Del 2008-9 Shemuel Behar es maestro de fonolojía en la Akademia de Múzika i Bayle en Plovdiv.

Matilda Koén-Sarano, 2013

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora