ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Sovre motivos de la felisidad
 

Sovre motivos de la felisidad / Yehuda Hatsvi
 
Aze kaje de dos anyos, meldi un artikolo interesante, titolado "Causes of Happiness" (en ingles) eskrito por la Prof. Claudia Senik de la Universidad
de Sorbone de Paris (Fransia).  Dunke, mi chiko artikolo aki, sera titolado: "Motivos de la Felisidad" (en judeoespanyol).
 
La Prof. Senik izo una investigasion sosio-ekonomika en varios paizes de Evropa, i topo ke los sivdadinos fransezes son satisfechos en un 20% menos
de los abitantes de otros paizes en Evropa. Los fransezes tienen keshas sovre los salarios, el nivel de la vida i de la edukasion en partikolar, i afilu les  embarasa la "ekspektiva de vida".
 
Fransia se konta entre los payizes mas dezvelopados en Evropa, kon sistema  liberal de governo i kon kultura bien rika, Dunke, aki surje la demanda kualos son los faktores ke kavzan este aire de pesimizmo i depresion entre los fransezes.
 
La investigasion ke izo la Prof. Senik bushko i topo ke ay faktores mas aya de salud, moneda o politika ke ifluensan a la "skala de la felisidad" i preokupan a los fransezes. Estos son faktores ke al pareser egzisten en la mentalidad de este puevlo:
 
1. Ya savemos, ke en el siglo 19, el franses era la lingua de la diplomasia i de los eruditos en todo el mundo. Oy, en muestra epoka, el ingles es el idioma ke utilizamos en la mayoriya de los paizes. Ma, los fransezes ke konosen solamente el idioma franses, se topan agora limitados kon sus kontaktos kon el mundo.
 
Segun la Prof. Senik, esta es una gran frustrasion ke aumenta la depresion nasionala de los fransezes.
 
2. Kada uno de los fransezes konsidera a si mizmo komo ke pertenese a una nasion distingida. En konsekuensia, en todas las eskolas en Fransia exijen a obtener niveles muy altos en los estudios. Esta korrida por alkansar el alto standard es muy apresiado, ma reduse el nivel de felisidad.
 
 
A propo, solamente  por kuryozidad entri en el Google a saver lo ke eskriven por Claudia Senik. Topi ayi unas sinko fotos de la profesora: Una mujer simpatika de edad de algunos 50 anyos, ma sin una sonriza en su kara...
 
 
La investigasion sovre "los motivos de la felisidad" me izo pensar i refleksionar komo podria ser el rezultado de un estudio de este tipo entre el puevlo judyo.
Malorozamente no tengo los medios para yevar al kavo una investigasion semejante entre los judyos, dispersados por todo el mundo,
(sanos i rezyos ke esten en todas sus moradas).
 
Entonses, kaminando i aziendo de mi para mi deduksiones de lo ke se disho sovre los fransezes, me alegro notar, ke lo mas de muestro puevlo avlan mas de una lengua. Tambien ay una grande masa de judyos ke son polyglotas, i ke konosen muchas lenguas, inkluye, naturalmente, el idioma del ingles.
Entonses, podemos kontaktarmos orozamente kon todo el mundo sin tener ningun sentimiento de frustrasion komo el ke sufren (aman!) los fransezes.
 
Pero ke pasa kon la singularidad del puevlo judyo?
Miliones de judyos avian meldado en la Biblia (Shemot 19, 5): "...vozotros seresh para Mi trezoro espesial,mas ke todos los puevlos".
Tambien, en varyas orasiones repetamos i dizimos: "Bendicho Tu Adonay....rey de todo el mundo, ke eskojo en nos mas de todo puevlo".
 
Ma, afilu sin meldar la Biblia, i en deshando de lado las orasiones, mos vienen en kada nada las novedades de Suesia, i mos dan haber  por mas i mas judyos ke ganaron el premio de Nobel. Numerikamente, el puevlo judyo es una fraksion menor del total numero de la povlasion mondial. De la otra parte, komo ya es savido en todo el mundo, la kantidad enorme de los sientistas judyos dekorados kon este premio prestijiozo, es mas aya de la komparizon kon los otros puevlos. 
Sera ke es grasias a los genes "judyos" ke se eredan biolojikamente?
No lo se.
 
Lo mas seguro es ke desde tiempos antiguos muestra nasion apresyava el estudio de valor supremo, i esta aspirasion mos akompanya asta oy.
El puevlo judyo konsedyo al mundo la idea del monoteismo etiko, i la maravioza kreasion yamada la Biblia.
 
Kon todo esto, al kontrario de los fransezes o de otras nasiones, kreo ke el puevlo judyo no se komporta arrogantemente en yevando el titolo de           "El Puevlo Elijido". Talvez, los 2000 anyos de persekusiones en el Galut/exilo mos izo entender mijor ke ser elijidos i eskojidos es una karga moral.           No es alguna rekompensa; ni benefisio material.
Ya vemos komo todo el mundo mos ovliga a un mayor nivel moral.
 
Espero ke el debate sovre el estado del puevlo judyo entre las nasiones no tiene ningun efekto negativo sovre el individuo de muestro puevlo en relasion kon el "nivel de felisidad".  Es por esto ke me dirijo a vozotros, karos lektores, kon unas kuantas palavras personales:
 
La felisidad es una desizion interna. Es mozotros mizmos ke desidimos lo ke mos aze orozos: Matrimonio? Ijos? Famiya?  Avtaha en el Dio? Lavoro?
 
Eskoje uno o mas de esta lista (o de otra lista), i va bive tu vida kon optimizmo para muchos i buenos anyos!                                    

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע