ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> Un epizodio en Oran
 

 Un epizodio en Oran / Yehuda Hatsvi


Mozotros, los sefaradim, tenemos la data de 1492 komo eskulpida i gravada sovre las palmas.

Ma, oy me permeto avlar sovre un fenomeno istoriko kaje inkomparavle: sovre una chika komunidad judia, ma bien aktiva, ke egzistyo i turo a bivir algunos 160 anyos en un territorio espanyol, DESPUES de la expulsion de Espania.
Ande?  -  en la sivdad de Oran.
Kuando?  -  entre el anyo 1509 asta 1669.
 
La sivdad de Oran es una sivdad a la kosta de la mar Mediterranea, en el oeste de Aljeria, serka de la frontierra de Maroko, i muy muy serka a la kosta de la peninsula iberika.
 
Oran fue estabilisida en el diezen siglo por komersiantes de Andalusia, fue anexada al reynado grande de Tlemecen,  i desde el anyo 1437 fue el porto sentral del paiz.
 
Judios bivieron en Oran, al pareser ya del siglo 14.  
Ma, por mas seguro, ay referensias i dokumentos sovre komunidad judia en Oran desde el anyo 1391.
 
En akel anyo amargo yegaron a Oran refujiados/muadjires judyos de Espania. Savemos sovre una korespondensia entre Rabi Amram ben Maravias Efrati de Valencia, i el Rav Yitzhak Bar Sheshet, (1326-1408), ke tambien desho su sivdad natal (Barcelona) i paso a bivir en Aljeria, (en otra sivdad).
 
Otro nombre famozo ke mos aparese en esta situasion, es Rabi Shimon ben Zemah Duran (1361-1442), de Mayorca, ma bivio unos kuantos anyos en Aragonia, i en akeos pogromes de 1391 tuvo de fuir a pie deskalso a Aljeria.
 
Asta el anyo 1509 bivieron los judyos en Oran basho un dominio musulmano.
En 1509, Espania konkisto a la sivdad de Oran.
 
En realidad, esto fue komo una kontinuasion direkta de la rekonkista kristiana kontra el Islam en propia Espania.                                                 Espesialmente podemos notar los diez anyos de gerra kontra Granada   (1482 asta 1492). 
Esta viktoria, en konkistando a Granada, evoko a los reyes katolikos el dezeo de desbarasarsen de los Judyos, esta uma (nasion) ajena i estranya.           Ma ayinda mas, el entuziazmo pusho a los espanyoles de krear inisiativas militaras kontra los vizinos en Berberia (ke ansi se yamavan en akel tiempo los territorios del Norte Africa).
 
Por akodrarvos, Oran fue konkistada en 1509 en un atako supetaneo por la armada espanyola enkavesada por Fransisco Sisneros, ke era tambien el obispo de Toledo, i el vezir preferido del rey Fernando de Aragon.
 
 
 
A mi, no me sorprendio de nada a saver ke las negosiasiones por la redision de la sivdad tomaron lugar entre Fransisco Sisneros kon un buen judyo de la famiya Satora, ke biviya en Oran.   
 
 
De los dokumentos espanyoles de akea epoka savemos por un kuartier judyo al lado de la Kasba, i -aparte de la famiya Satora- se nombran tambien las famiyas de Cansino i Zamiro.
 
De toda manera, el fato es ke las muevas autoridades espanyolas no teniyan ningun adjele, diziremos ansina, a expulsar a los judyos.
Al pareser ke el Kardinal Sisneros kontinuo la politika uzada en Espanya en los tiempos de la Rekonkista, de enkorajar djente (naturalmente, inkluye judyos) de vinir i instalarsen en las sivdades ke eran vaziyas de los enemigos vensidos.
 
En los primeros anyos de la prezensia espanyola, funksionaron Avraham Zamiro i Yitzhak Cansino komo ambasadores del rey de Tlemecen.          Otros judyos eran reprezentates de komersio o delegados de algunos otros princhipes en la rejion.
Los kastilianos ke entraron a Oran no se interesaron a saver o apartar entre sivdadinos judyos nativos, o akeyos ke 18 anyos antes fueron expulsados de Espanya.
 
Lo kuryozo es ke durante un periodo de 160 anyos, ombres, mujeres i kriyaturas kristyanos biviyan en kontakto kotidyano kon judyos, i krearon komo una sosiedad komun.
 
Los judyos se instalaron en Oran sin ke teniyan un permiso eskrito ofisial, aunke eran konsiderados komo "los vasales del Rey".
 
Afilu sin ningun dokumento ofisial, el fato ke los judyos biviyan en la sivdad desde la konkista espanyola, i afilu antes, les dyo este estado de "Vasales del Rey", i eran (de punto de vista juridika) basho la autoridad real. En otras palavras, djente (judyos o tambien musulmanos), aun ke no eran kristyanos, teniyan  el derecho de pedir, de exijir, djustisia, direktamente del rey.      Sozde el rey suyos.
 
Podemos dizir ke por kavzo de la utilidad, las varyas autoridades akseptaron ke una komunidad judia kreska i enfloreska adientro de una sivdad kristyana.
En grande parte esto fue "a posteriori", o un rekonosimiento "De Fakto".
 
En diferensia de los judyos o los konversos en la Espanya kristiana, la komunidad judia en Oran pratikava la relijion judia aviertamente. I malgrado ke era una chika komunidad, (ke kontava algunas 500 almas), ay muchos testimonios ke los judios de Oran mandavan kontribusyones a las komunidades proves en Erets Yisrael, i tambien azian kojetas para rigmir judyos de mano de piratas i korsaryos.
La pozision ekonomika de los judyos de Oran era muy buena, i lo mas de las famiyas judias posesavan esklavos musulmanos.
 
Por sus konosimiento de linguas, i espesialmente las linguas kasteyano          i arabo, teniyan komersios kon Espania  i kon los paizes de Norte Africa.
 
En las listas de alkunyas de los judyos de Oran sovresalen los sigientes:
Cansino,  Sasportas, Satora, Azulay, Navarro, Albo, Molho, Uziel i Al Hayek
(Mas ke seguro ke Al Hayek era un orijinario de algun pais arabo).
 
Los dokumentos espanyoles de akea epoka inkluyen un monton grande de korespondensia de judyos de Oran a los governadores, a los konsilios del Estado, al Konsilio de la Gerra, i mas
Estos manaderos mos amostran muy bien la forma ke los judyos savian reprezentarsen, i mos dan a saver sus relasiones kon aliados i kon rivales.
Por egzempio, un livro ke publiko Yaakov Cansino en Madrid, i en el livro el konta i rekonta los servisios ke el i su famiya konsederon al rey. De una parte, este livro mos da a saver mucho sovre sus aktividades, ma en publikando este livro kijo Yaakov Cansino a konvenser a los personajes importantes de Madrid a depozitar el posto de tradjuman del rey en sus manos i no en manos de la famiya de Sasportas.
 
La rivaldad i la kompetision entre las famiyas Cansino i Sasportas, los lideres de la komunidad judia, kontinuo toda la epoka de la egzistensia de la komunidad en Oran.
 
Ma, de toda manera, no era komo la enemistad entre las famiyas de Romeo Montaggio i Julia Capuletti. Meldamos kon satisfaksion ke avian i kazamientos entre estas dos famiyas nobles.
 
Ayinda mas, en kozas ke konsernan al bienestar de la komunidad avia entre los dos lideres -  lo ke yo yamava "una COOPETISION" (kompetision, ma tambien kooperasion).
 
 
En 1638, Yaakov Cansino depozito en la impremeria de Fransisko Martinez en Madrid la traduksion al kastiliano del livro "Extremos i Grandezas de Constantinopol" eskrito en ladino (kon letras de Rashi) por Moshe Almosnino, el rabino de Salonik. Mas ke seguro ke el Sr. Cansino kijo demostrar aki, una vez mas, su kapachedad komo traduktor.
 
Este livro de Almosnino es en realidad la treser parte de una trilogia (tres livros) sovre la estoria de los reyes otomanos.
 
Rabi Moshe almosnino (1518-1581) era un mediko i muy famozo erudito.     El traduiso eskritos de los filozofos Aristoteles i El-Ghazali, eskrivio unos kuantos livros, entre eyos el livro "El rejimiento de la vida".                          Este livro lo dediko a Don Yosef Nassi su suvrino, el ijo de su ermana.
 
Komo, posivlemente,  ya lo savesh, Don Yosef Nassi (1524-1579) resivio del sultan turko el titolo "Duke de Naxos i las islas Cicladas".
 
 
Ma toranremos a Oran:
 
Fue esta una ozadia de parte de Cansino a publikar este livro "Extremos i Grandezas de Constantinopol",  eskrito por un rabino judio,  en una monarhia katolika.  Ma malgrado todo, la senzura espanyola dyo su permision de imprimirlo, dando la razon ke es un livro informativo i nada mas, igual komo los livros del istoriador romano Tacitus (56-117), aun ke Tacitus avlava mucho kontra los primeros kristianos.
 
                          ****
Epilogo:
 
Es posivle, keridos lektores, ke en este kurto artikolo (bazado sovre muchos detalyos del livro del istoriador Jean Frederic Schaub),  avia deskrivido
 la istoria de la komunidad judia en Oran en kolor un poko roze.
 
Ma la realidad es ke kaje del empesijo de la egzistensia de esta komunidad avian muchas provas de echarlos de Oran. A vezes de parte de la inkizision, a vezes de parte de algunos faktores kompetidores   De toda manera, los judyos reusheron en kada vez de topar la proteksion, sea en konvensiendo al governador de Oran o al rey mizmo, o a su konsejero, etc.
 
 
El destino de los judyos de Oran se abolto de boka abasho en Avril 1669.       Fue esto djustamente lo ke uzamos a dizir "la istoria se repite".
Una reina espanyola, Mariana de Austria, la bivda del rey Felipe IV, sinyo el dekreto de la expulsion de toda la komunidad.judia.
De la noche a la maniana se desparesio todo lo ke fue logrado durante 160 anyos de konvivensia judea-kristiana.
 
Entonses, la komunidad entera, de grande asta chiko, fue ovligada a partir a los princhipatos italianos Saboya i Toscana.
 
 
Kon la expulsion de los djudios de Oran, se termino la epoka
(o la idea) de "Espania de las tres kulturas".

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora