ladino  

 
Judeo espanyol
Contador:

Inicio >> ARTIKOLOS >> Matilda Koen Sarano >> Programas de radio >> avraham perera
 
 

Personalidades de Israel

Avraham Perera
Kantante
(Yerushaláyim 1934 - 1984)


Avraham Perera nasió i kresió en Yerushaláim en el kartié sefaradí de "Abu Básal", ande absorbió las valores del kanto de la orasión i de los inmos sakros, i del kanto en ladino, ke después de anyos kantó él mizmo i enrejistró. En la eskola elemeantar del kartié  de Bet Hakerem estudió múzika, i se ambezó sovre todo los kantes patriótikos.
Su padre Aharon Perera, ke era shoför del "Hamekasher", kayó en el 1948 en el atako de los árabos al konvolyo para la Hadasa en el Monte Skopus. Este trájiko evenimiento kavzó en la famiya una kriza espiritual i ekonómika muy fuerte.
Avraham Perera se aroló a la armada i sólo por un kavzo fue "deskuvierto" komo kantante talentuozo por Mordehay Primán, ke lo enkorajó a formar un grupo muzikal kon Beny Amdorsky i Israel Gorión, ke empesó a produizirse en Yerushaláyim kon sukseso. Kuando sus dos kompanyos dechizaron de establesersen en Tel-Aviv, Avraham deskojó de kedarse en Yerushaláyim. 
El lavorava komo mekanisién en el "Mekasher" i estudiava kanto en la Akademia de Múzika i Kanto en Yerushaláyim. Kuando le fue propozada una beka para estudiar kanto en "La Scala" de Milano, él refuzó, para no  despartirse de Yerushaláyim.
El kantó kantes en ebreo i en otras lingua kon los miembros de la Lahakat Hatavlinim,  partisipó a munchas enrejistrasiones públikas para la Radio, i kantó en kibutzim i delantre de los soldados. En el 1965 Avraham kantó en el Festival del Kanto Israelí", i la kantiga ke kantó - "Rakefet"-  se kanta asta agora.
En el 1972 él partisipó a la komedia muzikal "No me yames preto".
Kon su piédrita en el 1984, el kanto en ladino pedrió un grande i irremplasable interpret.

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע