ladino  

 
Judeo espanyol
Contador:

Inicio >> ARTIKOLOS >> Sara Sufrin >> El Muzeo De Arte
 

El muzeo de arte "Ralli" en Kesaria

El Muzeo de arte “Ralli” en Kesaria, es uno de los sinko muzeos Ralli en el mundo, ke fueron fondados por  el sinyor Harry Recanati, miembro de la famoza famiya de bankeres, Recanati orijinarios de Salonik/Gresia.

El nombre de estos muzeos, fue tomado de la banka privada de una famiya de bankeres:los ermanos  Ralli, en Suissa, onde el sinyor Harry Recanati, izo la mayor parte de su kapital personal.

El primer muzeo fue establesido, en 1987 en la sivdad Punta del Este, en Uruguay; el segundo, en 1992 en Santiago de Chile, el treser muzeo en Kesaria, ke fue avierto al publiko en el 18 de octobre 1993;i el kuatren muzeo fue fraguado en el anyo 2000 en Marbeya, en el sud de Espanya.

El muzeo de Kesaria fue konstruido, en el estilo arkitektural- - klasiko-kolonial-espanyol, ke se integra muy bien en el panorama pastoral de esta lokalidad, situada al bodre de la mar.

Este muzeo ke su superfisia es de 9000 metros kuadrados, esta entornado kon una guerta en la kuala se pueden ver eskulturas ansi ke arvoles de aharovas,de Olivos, de datiles, i mas…

En este muzeo, ay sinko salas kon patios i fontanas en sus sentro. El patin, es kompozado de ladriyos de Terra Kota, ke tienen a sus deredor tiras de tavla;i de ladriyos blankos ,kon motivos en forma de fojas de kolor blu ke fueron fabrikadas en Uruguay espesialmente para el muzeo.

El muzeo Ralli de Kesaria, fue planeado tomando en konsiderasion, las kondisiones de klima del paiz. La luz, proviene de las grandes ventanas de los patios interiores.

EL etaj superior tiene una terasa bien grande, kon eskulturas de bronza i fierro, de los mas famozos eskultores evropeos komo: Dali, Rodin, Arman, Andre Masson i otros… En estas kreasiones, se entrelasan la imajinasion frente a la realidad, i la santedad frente a lo laiko.

El ke dezea gozarse de la vista i de la atmosfera, esta envitado a trankilizarse asentado en uno de los bankos ke estan aparados aya.

A traves de los arkos de esta terasa, se puede ver en el orizonte, el Akuadukto Romano de la antigua Kesaria.

La atmosfera Latino-Amerikana, realista, simbolika, fantastika, i folklorika, se puede ver en todas las direksiones.

Se puede dizir, ke en este lugar se enkontran, el arte plastiko, la eskultura, arkitektura i pintura, ke en sus mayoria son de Amerika del Sud i de la Amerika Sentrala. Todas las ovras de arte apartienen a la Fundasion Ralli. . Devemos mensionar, ke Harry i su mujer Martin Recanati partisiparon, paso a paso, a la kreasion del muzeo, sigiendo de muy serka todos los detalyos de la konstruksion

El Muzeo Ralli, tiene otrun buto: este es un monumento a la memoria de los Djudios ekspulsados de Espanya i Portugal, a la memoria de la komunidad Djudia de Salonik, ke se ekstermino kaji totalmente
en la Shoa, i a la memoria de los parientes de Harry Recanati, Leon i Matilda Recanati.

Harry Recanati demando tambien, de dos artistas, uno de Uruguay i uno de Mexico, de pintar – la Inkizision, la ekspulsion de los djudios de Espanya; i el deskuvrimiento de Amerika. Los dos artistas son Eduardo Sarlus de Uruguay i Arnold Belkin de Mexico. Sus grandes ovras kon el titolo de “1492″ estan aparadas en la sala prinsipala del muzeo.

Estas pinturas son del tipo “TRIPTIHON” – una forma de arte, uzada entre los artistas de la epoka del Renasimiento (Renaissance), i se trata de tres kreasiones de arte, ke entre eyas ekziste un kontakto ideolojiko o figurativo, i estan aparadas una al lado de la otra.

El sinyor Harry Recanati ,empeso a koleksionar ovras de arte en 1952 – espesialmente kreasiones Evropeas del movimiento Post-Impresionismo, Expresionismo i Modernas Figurativas. Mas tarde, en los anyos ochenta, djuntos kon su mujer la Dra. Martin Recanati, ayegoron a Amerika del Sud i Amerika Sentrala, ande se enkontraron kon un maraviyozo arte ke kaptivo sus korasones: arte kontemporaneo Latino – Amerikano. Desde este enkontro, empesaron a koleksionar todo lo ke era atado a este manyifiko arte. Sus seleksion, no fue bazada sovre el presio o la reputasion de los artistas, sino ke tomando en konsiderasion la grande rikeza artistika de kada una de las ovras ke merkaron.

Por esto, en la puerta de la entrada del muzeo, metieron una tabela kon la sitasion del artista Nicolas Pussin (Pusen) ke dize: ” El buto del arte – es el gozo”, i este sintimiento es mucho mas grande kuando se
puede kompartir kon el publiko.

El dezeo de Harry Recanati, es de atirar la atension del los vijitantes, a la arkitektura tradisional Espanyola i permeter al publiko Israeli, de koneser las ovras i los estilos de los artistas Latinos – Amerikanos kontemporaneos .

En una de las salas, tienen lugar ekspozisiones temporarias, ke se trokan una vez al anyo o a kada dos anyos.

En el etaj de abasho, ay una ekspozision arkeolojika yamada: “El suenyo de Herodes” ke deskrive la antigua Kesaria a traves de los siglos. La ekspozision, deskrive la vida en diferentes periodos, el proseso del lavoro de los arkeologos i la forma de rejistrar los rezultados. Esta ekspozision se puede utilizar komo introduksion de viaje a la antigua sivdad de Kesaria.

Al lado del muzeo Ralli 1, fue fraguado en el anyo 2007 un muevo muzeo: Ralli 2 para arte klasiko, yamado “Memoria de Espanya” i es dedikado a perpetuar la Epoka de Oro en Espanya, i sus famozas personalidades Djudias. En efekto este es el sinken muzeo Ralli.

Adientro del muzeo en las salas de los kuatro etajes, se pueden ver pinturas orijinales klasikas de los siglos 16 fina el siglo18 , kon sujetos ke tratan de la Biblia. I ansina en kaminando entre los kuadros, puedemos atornar a las istorias de la Biblia komo por exemplo: Adam i Hava en Gan Eden, Yaakov i Rahel allado del pozo, Noah i la arka i mas….

Todas las pinturas, fueron restoradas, por manos de restoradores de arte ekspertos, de Siena en– Italia.

A la entrada de este muevo muzeo, fue fraguado un grande kortijo inspirado del famozo palasio Alhambra en Granada, en Espanya. En su sentro, fontanas i a sus deredor pueden ser vistas, estatuas de marmol de famozas personalidades Djudias de Espanya komo: Ibn Gabirol, Yehuda Halevi, A’Rambam, ansi ke las estatuas de Cristobal Colon, Nostredamus i Miguel de Cervantes, ke se supoza ke eran desendiente de konversos. .

Frente a la entrada del muzeo, esta aparado un monumento de marmol en forma de un obelisko, en komemorasion de las komunidades Djudias de Italia ke fueron eksterminadas en la Shoa i de los Italianos ke salvaron Djudios durante la Segunda Gerra Mondial .

Al lado, se fraguo un sitio kon estatuas de marmol, de las personas ke kontribuieron a la kreasion del estado de Israel komo: Theodor Herzl, Chaim Weizmann, Arthur James Balfour, David Ben – Gurion i Harry
Truman.

El Muzeo Ralli, es una institusion ke se dediko a azer konoser la arte Latinoamerikano a los israelis.

Esta inisiativa, es dirijida totalmente kon fondos privados.

El muzeo Ralli, no aksepta donasiones de organizasiones publikas, o de fondos partikulares, de mizmo ke no aksepta, propozisiones de karakter finansiario.

La entrada a los muzeos Ralli es sin paga. El buto de sus fondadores es, de dar al publiko la posibilidad, de gozar del muzeo kon sus pinturas i eskulturas, i todo su ambiente.

El muzeo Ralli, no pretende ser didaktiko, no se realizan vijitas kon gias, i no tiene instalasiones audiovizuales i otras….

Su politika es, de deshar al publiko gozar de las ekspozisiones, kada uno de manera individuala.

Siendo, ke los muzeos Ralli ,se opozan a todo djenero de ganansia i aktividad komersiala, eyos no tienen en sus espasio magazenes de rekuerdos, librerias o kafeteria.

Finalmente, kero mensionar ke el grupo Ralli ,fue el primero en el mundo, ke establisio esta forma de muzeos en diferentes paizes.

Este presedente, fue adoptado despues por otros famozos muzeos internasionales

Sara Sufrin Baruch

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע