ladino  

 
Judeo espanyol
Contador:

Inicio >> ARTIKOLOS >> Gad Nassi >> kahina_es
 

 

KAHINA                                                          

La epopea de una reyna djudia-berbera

Gad Nassi

--------------------------

Ainda antes ke los kuzarim djudaizantes estuvieron empidiendo la invasion de los Kafkazes por los arabos, otruna armada dirijada por una reyna konsiderada komo djudia estuvo luchando kontra la invasion por los arabos de la Afrika del Norte.

En el anyo 694, kuando las armadas arabas estavan avansando verso el Oksidente en sakeando la kosta de la Berberia, los trivos djudios berberes se avian aliado kon la armada berbera para fayitar a esta invasion. Sus shefe militar era Kahina. Konosida i komo Dehiyya al-Kahina – la Ermoza Gazella la Profetesa – los Berberes la avian koronado komo sus Reyna.

La leyenda rakonta ke Kahina avia nasido a una famiya djudia ke morava en la kaverna, en el monte Aures. El shefe de un trivo djudio berbero terorizo su komunidad i kijo kazarse kon eya. Kuando Kahina lo repulso, el shefe mato a su djente. Entonses, Kahina se entrego a el, ma, lo mato la noche de la boda, en despedasando su kavesa kon un klavo, asigun el egzemplo de la eroina biblika Yael.

---------------------------------------------------------------------------------------------------------------------------

Las armadas arabas, despues ke sakearon la Persia, el Afganistan i el Norte de la India, en el Este, i mas despues el Ayifto i la Libiya en el Oeste, avansaron en la Afrika del Norte. Aunke estavan esperando un progreso fasil, fueron barradas en 694, por la rezistansia ferosa en la Berberia.

Los berberes se aunaron en el entorno de sus Reyna, Kahina la Djudia, djurando ke la segiran en la

lucha kontra los invadores. En segito del asasinato de sus reyes Kocilla por los arabos, soldados de los trivos berberos paganos se avian adjuntado a la armada djudeo-berbera. Kahina se avia konvertido en sus Reyna i sus Komandante militar.

"Leones de Afrika i de Yuda", ansi se eksklamava Kahina a sus soldados, "amostrarash a estos arabos ke nunka seremos esklavizados por el Islam. Muestra kerida Afrika kedara libre. Muestro slogano es… Libertad o la Muerte".

Basho su Reyna, el Norte-Oeste de la Afrika fue alimpiado de los mersenarios arabos. Sus Komandante elUkba, ke avia tentado de konvertir los Berberes al Islam, fue matado en una embuskada. Sus armadas fueron rempushadas verso Kairuvan, sus baza en Tunisia.

La segunda invasion araba fue mas masiva. Sus mueva armada de 40.000 kavalieros era basho el Komandante Hasan ibnNuman, ke avia kapturado a Kartago de los bizantinos. Kahina no kijendo konfrontarl a, la derivo en tomando la sivdad de Bagia de los bizantinos. De este modo, reusho a imobilizar la povlasion kristiana kontra las fuersas muslumanas. Kuando la armada araba asiejo a Bagia, Kahina salio de la sivdad kon sus soldados por pasajes sekretos. Los kavalieros de la Reyna, estuvieron pasando la noche enriva de sus kavayos, en obligando a los arabos de azer lo mizmo. Kon el amaneser, los kavalieros berberes atakaron a los arabos. La infanteria berbera formada del puevlo de Bagia – gregos, koptes i fenisianos – ke se avia unido en el entorno de Kahina, surjiso en mizmo tiempo detras de la armada araba en atakandola. Los kavalieros berberes estavan suvidos sovre ponis de montanyas eskarpadas, mientras ke los arabos estavan suvidos sovre kavayos arabos mas prestos ma inyervozos. Los djudeo-berberos egzaltados se presipitaron sovre los arabos gerreando kon simeterios kuando los berberes los transpersaron kon lansas. La armada araba fue enteramente derotada. Su kuerpo prinsipal se retiro fin'a Gabes en el Este, mientres ke los ke no pudieron alkansarlos perisaron en el dezierto.

Las armadas berberas konkestaron a Kartago i barieron el Norte de la Afrika en liberandolo de los arabos i de los bizantinos. Los kristianos saludaron la Reyna entanto ke sus liberator de los arabos. I las komunidades djudias ke salpikan las krestas de las Montanyas de Atlas, ke avian sufrido de taksas pezgadas basho la dominasion romana i bizantina, se adjuntaron komo volontarios a la armada de Kahina.

Durante sinko anyos ke segieron, la koalision de los diversos grupos lokales se mantuvo firmamente, i una perioda pasifika de liberasion de la dominasion ajena reyno en la rejion.

El komandante arabo Hasan, ke se avia ambezado por una amarga eksperiensa ke las armadas de

Kahina eran una fuersa formidable, uzo el klasiko enganyo diplomatiko, "divizar i reynar". Supiendo la ostilidad de los kristianos verso los djuios, les mando emisarios ke les ofresieron la tolerensia relijioza i la otonomia en ekspluatando sus latente ostilidad kontra los djudios. Los kristianos de la Afrika del Norte, ke estavan espantozos de una posible konkesta vizigota, fueron suseptibles a las promesas de Hasan, i fueron prontos a renunsiar a la libertad ke gozavan bashho la hegemonia djudeo-berbera.

En 694, IbnNuman atako kon una armada muncho mas numeroza, enfortesida kon soldados mandados por el Kalif Abd elMalik, i suportada por los kristianos. No seando pronta a konfrontarla, la armada berbera se retiro. Kahina, konvensida ke no puedera venser los arabos, desidio, en la esperansa ke puedera kedar la invasion, de kemar i destruir todo lo ke se toparia en el kamino de ibnNuman.

"Muestras sivdades", se avia eksklamado, "i el oro i la plata ke kontienen, atiraran perpetualmente a los arabos. Estos metales meprizables no son el objeto de muestra ambision, mos kontentamos kon la produksyones simples de la tierra. Vamos a destruir estas sivdades, vamos enterrar en sus ruinas estos trezoros pernisiozos, i kuando la aviditad de muestros enemigos sera apezada, es posible ke se esvachearan de pertubarmos". De Tanjer a Tripoli, los edifisios fueron demolidos, los arvoles de frutas fueron abatidos, las fuentes de subsistensia fueron eradikadas, guertas fertiles fueron trokadas en dezierto.

Las konsekuensias de esta desizion fueron fatalas. Los arabos eran konvensidos a apatronarsen de la Afrika del Norte, non por su rikeza ma, porke avia djente ke puedia ser konvertida al Islam, i porke era una puerta de entrada a Espania. La politika de Kahina de destruir las rikezas del payis le iva kostar el suporto de los berberes. Los moradores de las sivdades i de las yanuras ke avian observado sus proprietades destruidas, saludaron el retorno de los invadores musulmanos, komo si eran sus salvadores.

El kombate final ke tuvo lugar en Tabarka es ganado por musulmanes. Portanto, esto no fue una viktoria fasil. Aunke meno en numero, la armada de Kahina fue la prova de una rezistensia ferosa. Todo kon esto,la Reyna fue kapturada i dekapitada en un kugar yamada Bir elKahina – Pozo de Kahina . Su kavesa fue enviada al Kalif Abd elMalik; segun siertos fue arondjada al pozo.

Una otra version rakonta ke los ke la kapturaron le eparnieron la vida, porke era una mujer i una reyna. Kuando fue trayida delantre de Hasan, Kahina mantenio su aktidud altiva, i repulso el ofre de konversion o de tributo. Ansi, fue viktima de su patriotismo i de su fey, en seando dekapitada en la prezensia del Emir Hasan.

Los djudios i los berberos duvieron eskojer entre la konversion al Islam o, la muerte. Unos 50.000 refuzaron la konversion i fueron masakrados.

Kahina tenia tres ijos. El primero era konsevido de un padre grego kristiano, el segundo era el ijo de un padre berber, i el treser Halid era un arabo ke fue adaptado komo su ijo por Kahina, despues de ser kapturado.

Los dos ijos de Kahina – Irfan i Yezdia – se avian adjuntado al kampamiento arabo antes la batalia de Tabarka. Asigun una opinion repandida, eyos avian ajisado kon el orden de la Reyna. Ay de remarkar ke no se avian konvertido al Islam i no avian kooperado en esta batalia kon los musulmanos.

Se konvertieron mas despues i fueron nominados komandantes kuando Hasan avia desidido de konkestar el Maroko.

Kuanto a Halid, el se komporto komo un miembro fidel de la famiya de Kahina. Ma, kedo musulmano devuado en sekreto. Tanbien transmitio informasion sovre las atakas kritikas i embuskadas ke Kahino avia planifiado. De este modo, Hasan fue kapable de orientar el kombate. Es i posible ke su perfidia seando al punto de ser deskuvrida, se fuyo del kampamiento berbero i fue rekompensado por Hasan komo el segundo komandante de su armada. Halid konosiendo el lugar de los kampanientos berberes, de los guardos i de los lugares eskondidos fue nefasto por en la determinasion del destino de Kahina.

Entre las ruinas romanas de Teves – de muestros dias, Tebesa – i la aglomerasion Bir elAter, egziste un pozo yamado "Bir elKahina" – el Pozo de Kahina – en referensia o en la memoria del lugar ande Kahina fue asasinada. En Bagay, un chiko kazal, non leshos Henchela, egzisten las ruinas de un batimiento, konosidas komo las ruinas del "Palasio de Kahina".

* * *

Despues de aver establisido su supremasia, Hasan fue uno de los promotores de la islamizasion de la Afrika del Norte. La mayoria de los berberes se konvertieron. En konsekuensia, sus arkaika relijion politeista desparesio – portanto un sierto elemento de erezia kontinuo a persistir. Munchos berberes se trokaron en arabo avlantes, kuando algunos mantieneron sus propria idioma. Los berberes sovresalieron en la konkesta de la Espania por los musulmanos. I el Kristianismo desparesio en la Afrika del Norte, en el Oeste de Ayifto. Portanto, los djudios fueron mas rekalsitrantes i persistieron en algunas zonas, espesialmente en las montanias del Atlas.

Hasan manipulo astutamente la preokupasion de los djudios konsernando sus korelijionarios ke estavan sufriendo basho la opresion vizigota. Les ofresio un ramo de oliva en propozando una invasion kondjunta para salvar a los djudios de Espania de la tirania de los vizigotes. Todo kon esto, el ofre de kooperasion kon Hasan para invadir la Peninsula Iberika fue en primero transmetido por los djudios espanioles a Kahina, en segito del dekreto por los vizigotes sovre la apropriasion de todos sus bienes, la obligasion de los djudios konvertidos al Kristianizmo de no observar el kashrut, sus proibision de lnavigasion i del komersio kon la Afrika i kon los kristianos.





De este modo, el kamino de la Evropa es se avrio a los arabos. La estoria de esta mujer fugoza i indomptable, tiene dado lugar a una literatura konsiderable i a munchas leyendas. Si se refera a la tradision djudia, Kahina akodra la mitika komandante Dvora, ke despierto el puevlo djudio kontra la servitud. Esto le akordo el atributo, Dvora la Berbera. Para ser kompletamente objektivo, siertos kestionan su apartenensia a la relijion djudia, en admetiendo ke puederia apartenir a la relijion antika berbera ke se mantuvo en los Atlases. Todo kon esto, su apartenensia al Djudaismo es jeneralmente akseptada.

-----------------------------------------

 

 

 

 

 

 

 

 

 

 

 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora