ladino  

 
Judeo espanyol
Contador:

Inicio >> ARTIKOLOS >> Matilda Koen Sarano >> Programas de radio >> montes de israel
 
 

Montes de Israel

El Monte de los Ulivos
"Yerushaláyim Lanétzah" de Zeev Aner i Rony Shir,
Yediot Aharonot, 2005


Monte a Oriente de la Sivdad Vieja, en una parte del kual están plantados i oy àrvoles de ulivos. El monte viene akodrado varias vezes en la Biblia, i sigún lo ke es dicho en los livros de los Profetas, la resurreksión de los muertos empesará en la vaye de Yeoshafat a los piezes de Monte de los Ulivos. Por esto el monte fue deskojido para ser semeterio djudió de la époka mas antika. El semeterio djudió, ke se ekstende enriva del monte, fue en parte destruido durante la dominasión jordaniana en Yerushaláyim.
Después de la Gerra de los Sesh días fueron enterrados en el Monte de los Ulivos los kayidos en las batayas ke tuvieron lugar en la Sivdad Vieja en la Gerra de Endipendensia. 
En muestros días en el semeterio se  enterra sólo muy raramente. En la sima del Monte de los Ulivos se topan las tombas de los Profetas Zehariá i Malahy. Las tombas están en una kaverna, i al lado está la tomba de la Profetesa Huldá. El Monte de los Ulivos es sakro i a la tradisión kristiana, i se topan en él munchas eglisias.
 

Montes de Israel

El Monte Herzl
"Yerushaláyim Lanétzah" de Zeev Aner i Rony Shir,
Yediyot Aharonot, 2005


El Monte Herzl se topa a Oksidente de Yerushaláyim i es alto 830 metros. De él se veye un spléndido panorama de la sivdad i de sus enturajes oksidentales.
En su testamento Herzl eskrivió "Demando de ser enterrado al lado de mi padre, asta ke el puevlo djudió ará pasar mi kuerpo a Eretz Israel." El testamento del ke profetizó la fondasión del estado fue kumplido el 19.8.1949, i su bara fue trayida de Viena a Israel i fue enterrada en el monte, ke tomó de akel tiempo su nombre.
A la entrada del monte ay un chiko muzeo ande está  el estudio de Herzl i sus objektos personales, ke fueron konservados del 1928 en la kaza del "Keren Kayemet Leisrael". 
Al lado de su tomba están enterrados personalidades i lidéres emportantes en la istoria de la tierra i del puevlo djudió. En la esplanada delantre de la tomba tiene lugar kada anyo la seremonía de ensendimiento de las entorchas, para sinyar la fin del Día de la Memoria i el empesijo de los evenimientos del Día de la Endipendensia.
En el día de la muerte de Herzl, kaf de tamuz, tiene lugar al lado de su tomba una seremonía en su memoria. El Monte Herzl  está kolegado al semeterio militar sentral i al Monte de la Memoria, "Yad Vashem", de los muertos en la Shoá.
 

Montes de Israel

El Monte Skopus
"Yerushaláyim Lanétzah" de Zeev Aner i Rony Shir,
Yediyot Aharonot, 2005

 

El monte espasia sovre Yerushaláyim de nord-este, i su nombre viene mensionado por la primera vez en el Talmud. Es alto 830 metros sovre el livel de las aguas. Después de la Primera Gerra Mondial fueron fraguados sovre el monte la Universidad Ebrea (ke fue inaugurada en el 1925)  i el ospital "Hadasa". Después de la Gerra de Endipendensia el Monte Skopus fue destakado del Estado de Israel, i era un enklave dezmlitarizado en la area governada por Jordania. El monte era mantenido por chikas unidades de polizes ke se trokavan kada dos semanas. Después de la Gerra de los Sesh Días se empesó la rekonstruksión de la Universidad, ke fue avierta de muevo en el 1981. El ospital "Hadasa" también fue reavierto. En la area del monte se topa la kaverna de Nikanor – una  nuy antika kaverna de tombas del tiempo del Sigundo Templo, yamada a nombre de Nikanor, ke azía puertas en el Bet-Amikdásh. En la kaverna fueron enterrados en el 1934 los guesos de Yehudá Leib Pinsker, i en el 1941 fue enterrado Menahén Usishkin. En la parte nord del Monte Skopus se topa el semeterio militar britániko para los kayidos en la Primera Gerra Mondial.
 

Montes de Israel

El Monte Sion
"Yerushaláyim Lanétzah" de Zeev Aner i Rony Shir,
Yediyot Aharonot, 2005


Akí se topava la sivdad de arriva al tiempo del Sigundo Templo, ande moravan los rikos de Yerushaláyim. El nombre Monte de Sion no es muy antiko i viene akodrado por la primera vez en la Edad Media. El monte está kolegado kon el kantón a sud-oeste de la Sivdad Vieja, ke se yama Puerta de Sion. El monte está yeno de sitios muy emportantes para todas las relijiones. Akí se topa la tomba del Rey David, i a su lado el soteraneo de la Shoá, ke era el sitio sentral de rekordo de los muertos en la Shoá, antes de la fondasión de "Yad Vashem". Sigún la tradisión kristiana akí estava la kamareta de la "Ultima Sena" del Hristós i sus apóstolos, yamada por los kristianos "Kenakulum".
Akí murió Maria, la madre de Jezús, ande se topa oy la Eglisia de la Dormitzión.
A kavza de su santidad para los kristianos se topan al derredor del Monte Sion tombas de varias sektas kristianas.
Asta la Gerra de los Sesh Días el monte  era un enklave israelí, muy serkano a las murayas de la Sivdad Vieja, i era un observatorio sovre partes de eya.

 

La Menorá de la Kneset

"Yerushaláyim Lanétzah" de Zeev Aner i Rony Shir,
Yediyot Aharonot, 2005



Enfrente de la esplanada de la entrada de la sede de la Kneset se topa una grande menorá de siete brasos – símbolo del Etado de Israel – ópera del artista inglés Beno Elkan, donasión del Parlamento britániko, ke fue resivida en el 1956. Sovre la baza de la menorá está eskrito "Shemá Israel", i sovre los brasos de abasho está eskrito "No kon la gerra i no kon la fuersa, si no ke kon mi esprito, disho el Dio de las armadas".
Sovre los siete brasos están gravados akontesimientos i personalidades de la istoria de Israel, i entre eyos Moshé Rabenu ke alevanta los brasos, las Tavlas de Lay, Rahel ke yora a sus ijos, Rut la Moabita, la profesía de los guesos sekos, la revolta del Geto de Varsavia, el Profeta Yermiau, los sinko ermanos Makabeos, un hasid, Nehemiá ke fragua la muraya de Yerushaláyim, Hillel el viejo, Hananiá Ben Tradión, un kabalista, Aharon Akoén i sus dos ijos, Bar-Kohbá, el Mashíah, Yaakov ke kombate el ándjel, Yeshayau i la profesía de la Apokalipse, Yohanán Ben-Zakay ke desha Yerushaláyim, el Siglo de Oro en Espanya, sovre los ríos de Babilonia, Ezra el Sofer, Yeov i sus amigos, el Talmud, la Agadá, David i la kavesa de Goliyat, imigrantes illegales en barka, Avraam Avinu.

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora