ladino  

 
Judeo espanyol
Contador:

Inicio >> ARTIKOLOS >> Matilda Koen Sarano >> Programas de radio >> rab alkalay
 
 

Personalidades de Israel
 
Rabí Yeudá Ben Shlomó Hay Alkalay
Rabino sefaradí de los anunsiadores del sionizmo polítiko i relijiozo práktiko
(Sarayevo, 1798 – Yerushaláyim, 1878)

 
Nasió en Sarayevo (Yugoslavia) i izo su aliyá a Erets Israel a la edá de 11 anyos.
Era elevo de Rabí Eliezer Papo, el "Pele Yoets".  En el 1825 fue echo rabino i fue mandado a tener esta karga en Zamlin, en Yugoslavia.
En el 1839 publikó sus primeros livros "Darké Noam" i "Shalom Yerushaláyim" en ladino. Debasho de la enfluensa de la kalomnía de la sangre en Damasko en el 1840, publikó su livro de sermones "Minhat Yeudá", en los kualos está enkluyida la exortasión a azer la aliyá a Erets Israel.
En prinsipio kolaboró kon la "Alliance Israélite Universelle", ma kuando se diziluzionó de su aktividad,  tornó en el 871 a Erets Israel, se establesió antes en Yafo i después en Yerushaláyim i perkuró de enkorajar al ideal del retorno a Sión, fondando la "Hevrá Leishuv Erets Israel". Esto lo trusho a deskutir kon los rabinos del yishuv viejo.
El no se limitó al ideal, ma izo i programas práktikos para realizarlo: avló del renasimiento de la lingua ebrea, de una instansia al Sultán turko i a las grandes potensias, sovre un kuadro de organizasión para puevlar Erets Israel i sovre la fondasión de bankas ke konsentraran la rikeza privada para dezvelopar terrenos. En sus eskritos él deplora la mankura de pratisidad de los ke avlavan de Sión.
Durante los anyos `50 del siglo XIX, en el kuadro de sus tentativos de arrolar las potensias evropeas i los grandes djudiós a apoyar su programa pólitiko, él viajó a Fransia, Inglitierra i Almania, i eskrivió mizmo su ideolojía pólitika en el livro "Goral la". En este livro, ke salió en tres edisiones i fue mizmo traduizido al inglés, Rabí Alkalay publikó por la primera vez un programa sionístiko-pólitiko real i detalyado para la fondasión de una patria para el  puevlo djudió en Erets Israel, ke enkluye todas las bazas pólitikas i organizativas ke se toparán 50 anyos mas tadre en el livro de Herzl "Medinat Ayeudim". Es natural pensar ke Herzl vido el livro "Goral la" i interiorizó las ideas ke se topan en él, porké el padre de Herzl era su elevo, ayudó a la stampa de su livro en sus sivdad Zamlin, i su nono era tanyedor de shofar en el kal de Rabí Alkalay.
Del punto de vista del ideal teolójiko, él se unió al sionizmo, aziendo preseder la geulá natural a la geulá mirakoloza, sosteniendo ke el Mashíah Ben Yosef arivará antes del Mashíah Ben David. Su eksplikasión a las palavras de muestros rabinos za"l, kualmente todo está bazado sovre la teshuvá, Rabí Alkalay eksplikó ke la teshuvá es el retorno a Erets Israel.
La sivdad de Or Yeuda es yamada a su nombre.

 
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע