ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> rabi hayim benvenisti i el sabeitismo
 
 

Rabi Hayim Benvenisti i el Sabetaismo
Yehuda Hatsvi


En 19 de Mayo 2013 tomara lugar en el auditorium de Yad Ben Zvi
en Yerushalayim, un dia de estudio sovre "El movimiento del Sabetaismo en las komunidades sefaraditas".

Entre las konferensias en este dia de estudio:

* El Sabetaismo i sus efektos sovre la estoria judia
* Los Donme en Izmir, Salonik i Estambol en el siglo 20
* La biografia mesianika de Sabetay Zvi (yo prefero pronunsiar su alkunia                      "Sevy", ke ansi lo konosian muestros antepasados en Izmir i en Salonik).


Ma de ande mos kresio esta yerva mala, el Movimiento del Sabetaismo?

La estoria judia esta yena i kargada de gerras, egzilios i persekusiones.    Una lucha konstante para sovrebivir.  Me parese ke es sovre esta platforma pintada de desgrasias ke kresyo la emuna (o la esperansa) ke algun mashiah salvador vendra a rigmir a muestro puevlo de sus sufriensas.

En Ayifto, en kaza de eskalavedad -  el puevlo "esklamaron a Adonay en su angustia". 
En la opresion romana (antes kaje 2000 anyos) tenian muestros padres la esperansa en Bar-Kohva; ma el, no parvino venser en la gerra kontra la enorme armada del Imperio Romano.
En los pogromes del anyo 1648, los kozakos, enkavesados por Bogdan Hmelnitski, masakraron milaryas de judios en Ukraina. Aki ay de rekordar al sultan Mehmet IV (1641-1693) ke grasias a su autorizasion, miles de refujiados judios toparon abrigo en Estambol i en el espasio de su imperio.
Estos pogromes terrivles se gravaron en la estoria de muestro puevlo, konmovieron a toda la Diaspora i espertaron ayinda mas la aspirasion i el fuerte dezeo por el Mashiah, rigmidor de Yisrael.

Sovre estas sirkunstansias se levanto i se engrandesio el Movimiento mesianiko de Sabetay Sevy, nasido en Izmir. En 1654 viajo a Salonik i ayi
deklaro publikamente: "Yo so el Mashiah!". 

Adyentro de un kurto periodo de tiempo, este movimiento mesianiko metio a todo el mundo judyo en rebuelta, el entuziazmo aferro a las masas del puevlo, i afilu muchos rabinos hahamim se konvensieron ke tal vez ya yego la Geula.

La desepsion del puevlo fue tan grande komo las esperansas:              Sabetay Sevy, fue arrestado por el orden del sultan turko,                                i, (por salvar su vida), aksepto a konvertirse al Islam.
Este Mashiah falso kavzo al puevlo judyo una kriza grande de frustrasion        i deziluzion. Esto fue komo un terretemblo dramatiko i fondo.                           El proseso de la rekuperasion fue muy largo i gradual.

Akea epoka yena de ajitasion me da la oportunidad de avlar un poko sovre un rabino, muy savio, muy ilustre, el Rav Hayim Benveniste, (nasido en Estambol en 1603; murio en Izmir 1673).  
En su chikez era Hayim el elevo preferido de Rabi Yosef Mitrani, el Haham Bashi de Turkiya.
A la edad de 21 anyos ya empeso Rabi Hayim Benvenisti a eskrivir su livro de komentarios sovre el "Sefer Mitsvot Gadol".
Durante su vida, eskrivio unos kuantos livros importantes de Halaha.             Su amplio livro "Knesset aGedola", sovre el Shulhan Aruh, es rekonosido por todas las autoridades rabinikas. 

En 1643 fue nominado komo el rabino de Tirya (en turko: Tire). Despues de algunos 15 anyos lo yamaron a ser el Rav de la komunidad de Izmir. En todos estos anyos,  Ribi Hayim Benvenisti parvino ser bien renomado en el mundo judio komo un savio, eksperto en la Halaha, ma los Parnasim (dirijentes) de la komunidad, desidieron despues de poko tiempo, a nominar    i otro un rabino, el Rav Aron Lepapa (nasido en Manisa 1604-1667), para ke serviran uno a lado del otro en el mizmo papel de rabino.                               No savemos al fondo ke fue la razon de esta desizion de los parnasim.

Aun ke al Rabi Benvenisti no le agrado del todo este muevo arreglo,              el "mudrio sus mushos" i aksepto a este kompromiso. 
Mos kontan ke los dos rabinos kooperaron bien entre eyos, ma klaro ke un sentimiento de amargura i despecho kedo en el korason del Rav Benvenisti
por ser transferido en parte de su posto. 

[ Por no azer ninguna "diskriminasion" entre los dos rabinos, tengo de dizirvos ke el Rav Lepapa tambien era un autor de livros de Ley, entre eyos el livro "Bene Aaron". En su manseves era el elevo de Ribi Avraham Moutal de Salonik, i despues del gran rabino Yosef Mitrani ]

Sabetay Sevy, el falso mashiah, aparesio una vez mas en Izmir en septembre 1665. Esta vez, kaje toda la komunidad judia ya lo arresivio kon grande entuziazmo, aun ke los rabinos Aron Lepapa i Haim Benveniste, i lo mas de los rabinos de Izmir, se opozaron a Sabetay Sevy.                                     Rabi Benveniste fue el oponente mas fuerte, i demando de tomar medidas      i kastigarlo.

Un dia de Shabat (tres mezes despues) Sabetay Sevy, en su derasha en la kehila, aprometyo a sus oyentes, exaltados de la alegria, de ir pronto a la kapitala (Estambol), avlar kara a kara kon el sultan, i "konkistar el reino".

Rabi Haim Benvensiste, ayi prezente, se adreso a Sabetay Sevy i le demando: "ke es el senyal ke mos puedes dar por verifikar ke de verdad sos tu el Mashiah".
Aun ke esta pregunta fue dicha kon akavido, a Sabetay Sevy "le suvyo la birra", i empeso a mentar i ensultar de negra manera a Hayim Benvenisti, i echar sovre el Herem (boykot) "asta ke le demande perdon".

Despues de akel Shabat eskandalozo, los rabinos ke ayinda se opozavan al "mashiah" se toparon ovligados de fuir de la sivdad.

Lo mas sorprendente de todo fue ke el Rav Benvenisti paso supitamente a ser un segidor i partidario de Sabetay Sevy, el kual echo imediatamente al Rav Lepapa de su posto, i nomino agora al Rabi Hayim Benvenisti komo el solo haham bashi de la sivdad.

Rabi Hayim persevero su apoyo en Sabetay Sevy durante mueve mezes enteros, asta la kayida del "mashiah" ke se konvertio al Islam.
De akel dia amargo, i endelantre, el Rav Benvenisti fue el mas militante de todos los ke luchavan kontra los aderentes de Sabetay Sevy.


Ma, komo se puede eksplikar, o entender, este paso inesperado i inkreivle de parte de este rabino savio i erudito? Komo se enganyo a kreer en la iluzion del mashiah falso?

Al pareser ke Rabi Hayim fue fasinado de la karizma de Sabetay Sevy, de su konfiansa en si mizmo, de su ardor mesianiko, i de su saviduria en los sekretos de la Kabala.

En mi umilde opinion, me parese, ke Rabi Hayim Benvenisti, en su korason limpio i inosente KIJO kreer ke en fin, el Dio-Baruh-U se apiado de Su puevlo, i mos mando al Mashiah para ver maraviyas...

La konfuzion de Rabi Hayim Benvenisti fue un yerro grande de un personaje grande. 

...Es solamente el Dio el ke preva los rinyones i el korason.


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora