ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> revelasion de eliyahu
 
 

Revelasion de Eliyahu
Yehuda Hatsvi


En la tradision judia, Eliyahu el Profeta djuga un rolo muy importante. 
Segun muestra emuna, Eliyahu es el prekursor de la Geula; i en salida de Shabat lo nombramos kon karinyo. En noche de Pesah tenemos la kostumbre de aparejar un vazo de vino al onor de Eliyahu, i el Midrash mos konta ke Eliyahu el profeta es prezente en kada seremonia de Berit de los ijos
de Yisrael. Eliyahu aparese komo apansiz (en supito) en el livro
de Reyes I (kapitolo 17).

La Biblia mos konta unos kuantos akontesimientos  ekstraordinarios durante la vida de este profeta, asta  su desparision milagroza del mundo, suvido a los sielos en una tempesta i remolinos (Reyes II, kapitolo 2).
Durante las jenerasiones se akumularon en la memoria kolektiva del puevlo sienes de kuentos i lejendas sovre Eliyahu el profeta ke a vezes aparese en tiempos de sar  i angustia a salvar o ayudar a algun buen judyo o alguna 
komunidad judia en Erets Yisrael i en la Diaspora.

Ma, la aspirasion mas grande i mas sublime de muestros hahamim i rabinos era de tener Zehut de eksperimentar alguna "revelasion de Eliyahu", de ganar el mas alto merito, i de ambezar kozas de Ley o sekretos del Zohar de boka de Eliyahu.

Por darvos a sentir un pokito el tremendo respekto del puevlo a este profeta, vos do aki uno de los kuentos sovre la vida del kabalista Ribi Itzhak Luria (nasio en 1534 -  murio en el mez de Av en 1572), espesialmente kon 
atadijo a Eliyahu aNavi:

Yitzhak, ijo de Ribi Shelomo Luria, nasio en Yerushalayim. Antes de su naser, se aparesyo Eliyau i le disho a su padre, ke una alma grande esta para venir al mundo.

Kuando Yitzhak Luria era de 8 anyos, murio su padre. Dunke, su madre era ovligada de ir i bivir en Ejipto, ande su ermano riko, yamado Mordehay Franses.  Desde su chikez ya fue Yitzhak Luria (ke oy lo konosemos komo el Ha'Ar"i) notado por su grandor en la Tora. Sus maestros eran Ribi David Ben Zimra i Betsalel Ashkenazi.
Despues de kazarse kon la ija de su tio, uzava HaAr"i  a enserrarse a solas en una kazitika a la oriya del Nilo.  Ayi se le aparesiya Eliyahu, el kual lo ensenyava kozas muy  fondas, i le deskuriya sekretos de la Ley.
Para Shabat tornava HaAr"i a su famiya i se kuidava avlar  solamente en Lashon haKodesh (ebreo).
A la edad de 36, ordenado por Eliyau el Profeta, vino a bivir en la
Tierra Santa, a la sivdad de Safed. Ademas, lo enkomendo, de no perder tiempo, porke en los dos anyos ke le kedan de bivir, su mision 
sera de pasar toda la saviduria de la Kabbala a sus elevos en Safed, 
i espesialmente a Ribi Hayim Vital.

I ansi fue. 

   ***

En mi chikez, mi madre (komo siempre por darme algun moral o dotrino),
me avia kontado una konsejika kon Eliyahu.
Ma, vos aseguro ke tala no egziste en ningun livro o koleksion de los kuentos 
de Eliyahu aNavi.


Avia en una de las tierras del Imperio Otomano un rabino, 
Sistrano se yamava..  
I era este jidio bueno i derecho, i temerozo del Dio, i apartado del mal.

Harbi Sistrano bivia en kondisiones de povreza, ma nunka no se keshava, 
ni mensionava en su orasion los problemas de la egzistensia. Todo su dezeo
era de ser dinyo a ver una revelasion de Eliyahu el Profeta, sea afilu por un
kurto tiempo.
"Kien al Dio Espera, no se dezespera"; i na, ke un dia yelado buz de envierno, en medio de una tormenta de nieve, aparesyo Eliyahu, kon su manto kolorado sovre sus ombros, al enkontro de Rabi Sistrano, i lo yevo a una kavanya aislada en el boske.
Antes de entrar a la kavanya se echo Rabi Sistrano sovre sus fases, i toko 
reverentamente el borde del manto santo.

Afilu en entrando a la baraka, Rabi Sistrano temblava de emosion i titereava de tanto frio. Grasias al Dio ke la lumbre en el fogarero kaentava bien el ambiente. Harbi Sistrano kedo parado en pies, i no se atrevo a mirar en los ojos de Eliyahu.  Komo uno somnambulo, sintio al profeta diziendole: 
"Asentate, Ribi Sistrano. Empesamos a estudiar".
El dia entero asta medianoche no kito Ribi Sistrano ni un "pi" de la boka, fasinado de la ensenyansa sublime del gran profeta.

Al segundo dia, se entereso Rabi Sistrano mas i mas en el estudio, i a reunido koraje a demandar unas kuantas preguntas. Estava tresalido de la alegria a ver la buena sonriza en la kara de Eliyahu aNavi, enkorajandolo durante la lision.
El ambiente fue tan amable asta ke Rabi Sistrano se dirijo al profeta por su nombre: "Eliyahu!".

En el treser dia, el frio afuera se izo mas intenso, i en el mizmo tiempo, la lumbre en el fogarero se avia apagado. Era un poko difisil para Harbi Sistrano konsentrarse en el estudio.

Eliyahu aNavi se levanto de la meza i disho: "Vo salir al kurtijo a trayer lenya para arrebivir al fuego en el fogarero".   Lo dicho - echo. 

Ma, en korriendo kon adjele afuera, desho el profeta la puerta avierta de par en par. Un viento fuerte de frio entro al interior de la kavanya. 

- "Ey, Eli!"  grito Rabi Sistrano  
                                           "Lenyo! Kavesa dura! deshates la puerta avierta!".

 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora