ladino  

 
Judeo espanyol
Contador:

Inicio >> ARTIKOLOS >> Yehuda Hatsvi >> sovre dos primos de trieste
 
 

Sovre dos primos de Trieste
Yehuda Hatsvi
 


El refran, un pokito umorista, mos dize: "El judio, ande no lo asembran,
aya lo akojen".
Malorozamente, la realidad no es divertiente tan komo el refran:
Durante los 2000 anyos de alkavo, los judios no fueron de nada turistas komun, ni algunos simple viajeros. Persekuidos por las malas personas, echados afuera, i ekspulsados, tenian los judios de vagar i pasar frontieras      i mares, bushkando algun refujio 

Es de admirar la kompetensia de akeos judios, sean afilu pokas famiyas, de konstruir de muevo sus komunidades bivas i aktivas, pronto en yegando a sus nuevo lugar de rezidensia.

Kon un poko de enbidia, mesklada kon admirasion, ya lo observo un antisemita muy famozo:
 "El puevlo ke komo leon se levantara, i komo leon se elevara".

Una de las komunidades, non-grandes, ke absorbo imigrantes judios de varios paizes, es la komunidad de Trieste (nort-este de Italia, a la kosta de la mar Adriatica).

Judios se instalaron en Trieste al menos desde el siglo 13.
En 1382,  la sivdad fue anexada a Austria, basho el dominio de la dinastia de Habsburgo. En akea epoka, el numero de los judios en la sivdad era algunos 60 de eyos adientro de una populasion de 3000.

Desde la segunda metad del siglo 17 empeso una imigrasion de judios ekspulsados de Vienna ke se instalaron en Trieste.

En el anyo 1684, el governo ordeno ke todos los judios tienen de morar en un geto, i tqambien yevar una "estigma" para asinyalarlos komo judios.

En 1729, Trieste fue reklamada komo un puerto libero. Judios de Corfu i de otros paizes vinieron a bivir en la sivdad, i el numero de los judios se aumento. En el fin del siglo 18 kontava la komunidad mas de 1500 almas.

Desde el anyo 1738, los judios estavan exentos de yevar akea "estrea amariya". En 1771, la reina Maria Theresa (1717-1780) desho a los judios de estabelesersen en todas partes de la sivdad, i los judios empesaron ser aktivos en todos los ambitos de la ekonomia.

El emperador Josef II (1741-1790) publiko su "Editto di Toleranza" en 1782,    i gradualmente, en el interval de los proksimos 50 anyos, los derechos de los judios fueron komparados kon los del resto de la povlasion.

En este ambiente de una libertad relativa, kresyeron en esta chika komunidad judia, djente komo Giuseppe Lazarro Morpurgo (1759-1833) ke fondo la renomada kompania de segurita Assicurazioni Generali. Tambien nombrare aki a Salvatore Barzilai (1860-1939), avokato, kriminologo i politiko, ke era uno de los fondadores del Partido Republikano Italiano.

Ma, toda mi intension fue de prezentarvos los dos primos ilustres de la famiya Luzzatto: Rachel (1790-1871), i Shmuel David (1800-1865). 

El orijin de la famiya Luzzatto es de la rejion de Lausitz/Lusatia (oy en el Este de Alemania). De la estoria savemos al menos por un buen judio, yamado Avraam Luzzatto, ke prefero a bivir, (en el siglo 16), en la sivdad de Safed,  en Erets- Yisrael. Ayi. Entre la grande komunidad de los sefaradim, se ambezo por seguro a avlar en judeoespanyol, ademas del ebreo, la lengua "semper vivent" del puevlo judio, lengua ke el ya savia de su chikez.

En Trieste, (en el anyo 1800) nasio Shmuel David Luzzatto (konosido en la estoria judia komo SHaDaL).

A la edad de 4 anyos, su padre lo mando a la eskola judia. 
Komo ninio de ocho anyos, ya empeso eskrivir kantes en ebreo i en italiano.
Despues de terminar sus estudios en la eskola publika, Shmuel David kayo hazino por kavza de sus esforsos eksesivos en sus estudios. Dunke, el kontinuo a ambezarse en kaza, djuntos kon su padre.
Aparte de las lenguas italiano, ebreo, i fransez (las ke avia ambezado en la eskola), empeso a estudiar otras linguas tambien komo aleman, latino,            i lenguas semitikas.

Shadal tradusido al italiano, el Humash i otros livros de la Biblia, kompozo kantes, i eskrivio un livro de gramatika de ebreo i arameo. A la demanda del emperador, el tradusido el Siddur (livro de orasiones), i eskrivio muchas investigasiones en el kampo de la estoria judia, la poezia de los judios en Espania en la Edad de Oro, i mas.

Las teorias orijinales de Shadal se formaron grasias a su konosimiento de la kultura judia, sus estudios en filozofia i en el pensamiento evropeo.
El enlaso entre el rasionalismo i el romantisismo, aun ke por varias razones el negava el mistisismo i la Kabbala.

La vida de Shadal fue yena de obstakolos:

* Komo maestro, i despues komo profesor en el Midrash de rabinos en Padova, sus mezos de mantenimiento eran muy eskasos. 
* Su mujer sufria de enfermedad mental, i el la kuyava kon devosion durante muchos anyos.
* Su ijo behor, Ohev-Ger, murio a la edad de 24 anyos (despues de kumplir una investigasion linguistika sovre la traduksion aramea de Onkelos).

Pokos i malos fueron los dias de los anyos de su vida,                                  (sin ninguna komaprezon kon su grande aporte a muestra kultura).
Rachel Morpurgo (1790-1871) era la nieta del poetaYitzhak Luzzatto.           De parte de su madre era la prima de Shmuel David Luzzatto.

Asta la edad de 12 anyos embezo de boka de sus tios, la Tora kon los komentarios de Rashi, i tambien otros livros de varios eskritores rabinikos.
A la edad de 14 anyos empeso a estudiar el Talmud kon el Rav Ben-Nadiv   de Mantova.

Durante unos kuantos anyos uzavan Rachel kon su primo Shmuel-David  enkontrarsen en la kaza de sus nono, i estudiar djuntos en la sala grande, yena de livros.

Rachel se kazo a la edad de 29 anyos kon un mansevo de la famiya de Morpurgo. Yaakov i Rachel tuvieron tres ijos i una ija.

El poeta Giuseppe Almanzi de Padova, ke se instalo en Trieste, la enkorajo a Rachel de publikar sus poezias (ke uzava eskrivir en ebreo desde el anyo 1808). Dunke, a la edad de 57 anyos komensaron los periodikos ebreos de akea epoka a publikar las poezias i los kantes de Rachel Morpurgo.
En sus kantes se nota su espirito de mujer libre. feminista. Ma, ensima de todo, eya aparese mezo sus eskritos, komo una kreente apasionada en la Regmision del puevlo.

En el anyo 1808 se preparo adjuntarse al Sir Moshe Montefiore a su primer viaje a Erets Yisrael, ma por siertas razones familiares, no se realizo su veluntad.

Rachel murio en 1871, ma en el anyo 1890 (100 anyos de su nasimiento) salyo a luz una koleksion de sus poezias.


Para mi, Rachel Morpurgo i Shmuel-David Luzzatto, los dos primos de Trieste, simbolizan la alta kalidad de djente ke krese entre muestro puevlo, sea afilu en las mas chikas komunidades.

 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora