ladino  

 
Judeo espanyol
Contador:

Inicio >> ARTIKOLOS >> Sara Sufrin >> Un Mundo Ke Se Desparese
 


  UN MUNDO KE SE ESTA DESPARISIENDO

En la sivdad Tel Aviv, al kartie komersial, serka de Florentin,un kartie ke fue fondado por imigrantes ke vinieron de Gresia en los anyos vente, ay una chika i unika  patiseria  ke se yama - "ALBERT" al nombre de su fondador, Albert Yehuda ke era patron de patiseria muy renomada en Salonik.
 
En la kaleja Matalon numero 36, entre las vetrinas de las butikas, esta eskundida una chika vetrina, ke kontiene unas kuantas tabakas simples, enriva estan aresentados chinis kon una mostra de varios tipos de dulserias, al lado de kada chini ,esta aparado un papeliko, kon manuskrito ke eksplika su kontenido.
 
Al entrar  a la butika se siente komo ke el tiempo se aparo. El formasion del moble i la simplisidad no fueron trokados desde ke Albert Yeuhda la avrio, aze mas de setenta ayos. Su fijo Yaakov Yehuda i su mujer Levana, estan kontinuando a fazer dulserias i  pasteles kon savores i rechetas originales, traidos de Salonik, por Albert.
 
Los Sefaradim, i los afeksionados de savores de kaza, pueden topar aki los diferentes tipos de dulserias i pasteles komo:
BEZES ヨ echos de mareng ke se derriten en la boka.
Tajikos de:  BIMBRIO,PERTUKAL ect...
KONFITES ヨ bombones de almendra en kolores: blanko,roz i siel ke ande los Sefaradim, se sierven dientro de bolsikas de tul en evenimientos de bodas i alegrias.
MARUCHINOS - roskitas dulses de almendras mundadas, ke Yaakov los muele en polvo, kon piedra de mulino, se sierven espesial en Pesah.
Tajikos de MASAPAN / MOGADOS - de almendra freska mulida, kon savor deliziozo (mi papa z"l diziya ke esto es:"lo ke dyo el rey a la reyna")..
SHAROPE ヨ konfitura de asukar. ke solo los espesialista komo Yaakov, fijo de Albert, lo saven a preparar.  Muestras madres lo tenian en kaza en kavzos de aparision de musafires.  Lo servian kon kucharika adientro de kopo kon agua yelada.
 
A ken ke le dezea, puede topar tambien kozas de forno dulses o saladas komo: Baklava, Kadaif, Shamli,varias de burekita i burekas kon gomos de Kezo,Spinaka o Merengena, todo zavrozo de chupar los dedos !
 
Yaakov Yehuda, es un ombre muy simpatiko, siempre esta pronto a oferar a kualunke entra en su lugariko enkantado , a gostar i a gozar del trezoro, echo de su mano.
 
Malorozamete, parese ke ya esta aserkando el dia ke este "pedasiko de Gan-Eden" se va despareser del mundo, por la razon ke la manseves de la famiya Yehuda, los bizinyetos de Albert, no les enteresa  a kontunear  esta unika ovra.
Ke pekado !  
 
Sara Sufrin Baruch 
 
 
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios
+ Enviar contenidos sugeridos

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע