ladino  

 
Judeo espanyol
Contador:

Inicio >> ARTIKOLOS >> Matilda Koen Sarano >> venezia
 
 

VENEZIA
Matilda Koén-Sarano, 2006
 
ISTORIA
 

La Republika Federativa de Venezia empesó a naser, sigún la tradisión en el 466, para defender el territorio ke fu invadido por los puevlos ke arivaron de Oriente i destruyeron todo a sus pasaje. Vizigotos, Vádalos, Unnos, ke abasharon de las muntanyas, reusheron a destruir asta Aquileja, no deshando piedra sovre piedra. Fueron los reskapados ke se refujiaron en las izlas de la laguna, fondando una republika federativa (520). En los tiempos de Teodoriko (463-526) uvo un periodo de prosperidad. El periodo de los Longobardos fue difisil, porké eran de fey ariana. Los abitantes de la rejión demandaron el ayudo de Bizansio. Fue fondada Eraclea, ke tuvo un grande splendor, atada al Impero bizantino. El primer doge de Eraclea fu Paoluccio Anafesto (m. 717). Las batayas entre las varias izlas se izieron fuertes, i el Doge izo tranferar la sede dogal a Malamocco (742). En el 813 la sede dogal fue tranferada a Rialto, ande surjió la sivdad de Venezia.
Venzia es konstruida sovre 118 izlas unidas por medio de kanales, ke son las kalejas de Venezia (se yaman calli). En Venezia se va o a pie o en barka. Venezia es famoza en el mundo entero. Su arkitektura tiene de la enfluensa moreska, i es un kapolavoro de ermozura.
Los djudiós ke komersiavan entre el Oriente i el Oksidente devía por fuersa pasar por Venezia, ke en realidad no kería sus prezensia en eya. Savemos ke en el 1152 avía un total de 1,300 almas. Eyos pudían estar en la izla de Sinalunga, ke después tomó el nombre de Giudecca.
A la fin del siglo XIII, malgrado la entoleransa ekonómika i relijioza, se formó un buen nukleo de djudiós en la republika. Los djudiós akel tiempo tenías los bankos de empréstimo de dinero. En el 1366 fue konkluyido un akordo (condotta) kon los emprestadores de dinero djudiós de Mestre ke fueron envitados a establesersen en Venezia. La condotta fue renovada varias vezes, ma los venesianos kerían i no pudían liberar la sivdad de los djudiós. Los primeros djudiós de Venezia, ke exersitaron la uzura eran almanes (tedeschi). La medisina fue exersada liberamente por los djudiós, i los médikos no tuvieron ni de yevar el sinyo, mizmo kuando se izo uvligatorio. En el siglo XV se multiplikaron las akuzasiones de omisidio ritual, i nada valió ke el Papa mizmo se entrometió para dezmentirlas. Los djudiós fueron persegidos, i algunos de eyos kemados en Venezia.
La ekspulsión de los djudiós de la Espanya i del Portugal (1492) (1497) izo empesar la imigrasión de los konversos o marranos a Venezia. Esto provokó i la aviertura de los prosesos por djudeizasión de la Enkizisión.
Una parte de los marranos tornaron al djudaizmo. Se fondó el primer geto en Evropa.
 

DJUDIOS SEFARADIS MARRANOS i KRISTIANOS NUEVOS EN VENEZIA

 
Durante el 400 ay una chika prezensia de djudiós i konversos de orijín ibérika en Venezia. Eyos son muy aktivos en el komersio. Kuando empesaron a arivar en grande kantidad, después de las dos ekspulsiones, los djudós de Venezia no los vieron de buen ojo. Al prinsipio del 1500 arivaron en grande número, i dingún editto no reushó a azerlos desistir. Estos eran los ke fueron forsados a konvertirse, por razones de opurtunidad. I mas adelantre sus ijos, ke ya eran kristianos, ma mantenían raportos kon los djudiós, por razones de komersio. Avía siempre el períkolo de la denunsia a la Enkizisión i los prosesos por djudeizasion. En la sigunda meta del siglo XVI la Enkizision djuzgó serka de 20 marranos. Kon el pasar del tiempo su fuersa se fue debilitando. Ansí ke se veye ke
el tribunal de la Enkizisión en Venezia no fue muy duro. Se puede ambezarse muncho sovre el mundo de los marranos, meldando los prosesos ke tenían lugar. La kestión de las dos bivdas Mendes, de las kuala una era Dona Grasia i la otra su ermana Brianda, ke la denunsió a la Enkizisión, mo lo puede ambezar. O la kestión de la famiya Ribeiro, ande se veye la dizgregasión de la famiya, entre djudaizmo i kristianizmo.
Las visisitudes de los marranos en Venezia entran en los raportos sekolares de la Evropa kristiana i el Impero Otomano.
 

La Enkizisión en Venezia

 
El envestigador Pier Cesare Ioly Zorattini publikó varios livros[1] sovre la Enkizisión de Venezia kontra los konvertidos djudaizantes en Venezia, i mos da los verbales de las denunsias kontra de eyos.
En el periodo entre el 1642-1681 de prosesos verdaderos no tenemos testimoniansa, ma venimos a konosensia de las imputasiones  de majía i okultizmo, de exorsizmo i de alkimía.
Ay kavzos en los kualos un miembro de la famiya denunsia otro miembro. Ay i imputasiones de aver bushkado de konvertir kristianos, ke vienen absolvidos por la Eglisia, despues de penitensia.
Riccardo Calimani, eskritor kontemporáneo djudió de Venezia eskrivió 14 livros sovre la Enkizisión en Venezia, traendo toda la dokumentasión de los kavzos.
 
 

EL GETO

 
El dokumento ke atesta la konsesión de la “Serenissima” a los djudiós es del 1386 de azer de un pedaso de tierra a S. Nicoló del Lido semeterio de los djudiós. Avagar avagar, malgrado el alternarse de permisos i proibisiones los djudiós se izieron un nukleo emportante. El governo de la Republika deskojó en el 1516 un lugar al lado de las fonderías, “geti” en venesiano, pronunsiado por los ashkenazís “geti”. Además establesió ke los djudiós devían un sinyo partikolar en los vistidos, i los ovligó a tener los bankos de prendas, sigún los pursantajes, fiksados por el governo, i a substar a otras reglas pezgadas. En kambio ivan a resivir libertad de kulto i proteksión en kavzo de gerra. El geto vinía serrado de noche, i los djudiós eran defendidos de salir. Nasió ansí el primer geto de Evropa.
En el 1555 suve el Papa Paulus IV, elevo de Inyazio de Loyola, ke kita una Bolla terrible para los djudiós Cum nimis absurdum, ke les defende de tener bienes stables, de tener sirvidores i nutrises kristianos, de exersitar la medisina, de eskrivir en karakteres ebreos, i munchas otras restrinksiones ensuportables.
El kavzo mas triste fue el auto-da-fé de 24 djudiós en Ancona, ke Dona Grasia no reushe a salvar. En el 1559 muere el Papa Carafa, i el puevlo de Roma destruye el palasio de la Enkizisión, arrasta la statua del Papa por las kayes, kon en la kavesa un beré amariyo, komo avía empozado a los djudiós.
La primera area del geto- o Ghetto nuovo- ospitava al prinsipio 700 personas (djudiós italiano i tudeskos). Después fue ancheada kon el adjustamiento de otras dos areas- el Ghetto Vecchio en el 1541 i el Ghetto nuovissimo en el 1633. En el geto arivaron a morar en el 1600 asta 5,000 personas. Las kaza ke fureon konstruidas a los gastes de los djudiós, arivaron asta 8 etajes. Dos fenomenos graves tokaron los getos, uno a los abitantes, i es la peste en varios periodos, i el sigundo es los fuegos.
El Geto vido una rika florezón de prezensas kulturales, sovre todo en el 500 i en el 600, de las emprimerias djudías a los Rabinos, komo Leone da Modena i Simone Luzzatto, a la poetesa Sara Copio Sullam. En esto siglo fueron erijidos, además de munchos midrashim (lugares de estudio i de orasión), las 5 sinagogas mayores, yamadas “Schole”. Los djudiós pudieron organizarsen en “Universitá”, kada una kon su administrasión, su rabino i su sinagoga. La toleransia i la proteksión ke los djudiós gozaron en Venezia no fue nunka dezenteresada, porké, a parte los bankos de emprestimo ke los djudiós djestían, eyos duvieron pagar tributos exorbitantes, ke pujavan en tiempos de gerra. En el 1515 los djudiós fueron autorizados  a avrir butikas de ropa vieja (strazzeria). Fueron los djudiós almanes ke fue resivieron la autorizasión. En el XVI fue permetido a los djudiós de okuparsen del komersio maritimo kon toda la Evropa, i sovre todo kon el Levante, i después kon la Amerika. Uvieron djudiós ke se izieron muy muy rikos. Las mujeres se vistían kon grande lukso. En el Ghetto Nuovo fue avierto en el 1614 un atelié de alkimía por el ijo de Leone da Modena, Marco, endjuntos kon un papás.
Eyos reusheron a produizir plata, ma en poko tiempo el djoven murió por entosegamiento de los vapores de arseniko.
|Las sinko sinagogas de ritos diferentes koabitaron en el geto, i existen asta agora. Adientro del puevlo djudió se pueden asta agora destingir 3 famiyas: los sefardim de orijín espanyola, los ashkenazim de orijín almana o de la Evropa Oriental, i los djudiós italianos, ke arivaron a Italia después de la destruksión del Templo de Yerushaláyim, kon las trupas de Titus (70 d.C.).
En el 1797, después de la kayida de la Serenissima, Napoleón dekretó la fin de la segregasión en el geto. Los djudiós se izieron sivdadinos komo todos los otros, koza ke se izo definitiva kon la aneksión de Venezia al reynado de Italia.Los djudiós mas rikos salieron del geto i merkaron kazas i palasios, líberos de morar ande kerían.
En el 1938, kon la promulgasión de leyes rasiales fashistas, los djudiós fueron privados de los derechos siviles. Las persekusiones nazi-fashistas yevaron en Venezia a la deportasión de 204 djudiós, de los kualos solo 8 tornaron atrás. El eskultor Arbit Blatas izo un monumento en memoria de los mártires, en la paré al lado de la Kaza de Viejos de Venezia, ande él, lituano, inmortaló su madre también, ke murió por mano de los almanes.
Oy los djudiós de Venezia son un poko mas de 600, i están esparzidos entre Venezia i Mestre.
 

LAS SINAGOGAS

 
La primera sinagoga ke fue konstruida es la Schola Grande Tedesca, ke fue konstruida en el 1528-29. En el 1531-32 fue konstruida la sinagoga yamada Schola Canton, i eya utilizada por los djudiós tudeskos de rito ashkenazí. En el 1538 fue konstruida la Schola Levantina en el Getto Vecchio, para los djudiós vinidos del Oriente, i en la sigunda metá del siglo XVI fue konstruida la Schola Spagnola, todas las dos de rito sefaradí. La última konstruida fue la Schola Italiana, la mas semple, ke fue konstruida en el 1575. Las sinagogas kedaron intaktas por siglos, i forman un unicum del punto de vista artístiko, arkitetóniko i istóriko.
Sólo dos sinagogas están oy día en funksión: la Espanyola i la Levantina, 6 mezes la una i 6 mezes la otra a torno.
 

EL MUZEO 

 
El Muzeo de Arte Ebraica fue avierto en el 1955, i de akel tiempo fue enrekesiendose de emportantes donasiones. En el 1986 fue echo el projekto de englobar en una únika area el muzeo de las tres sinagogas ke están en el Ghetto Novo. Por oras ay en el muzeo una rara i presioza koleksión de ropas i de objetos de plata, ke vienen de las 5 Scholas de Ghetto. Ay i una koleksión de ketubot italianas.
Adientro del Ghetto de Venezia está la Biblioteca-Archivio Renato Maestro, ke nasió en el 1981, por inisiativa de la Komunitá. En la biblioteka ay 7842 títolos en varias linguas. En el katalog de livros antikos ay 2,500 volumes. Además ay una ancha rekolta de dokumentos sovre la prezensia ebrea en Venezia  entre el XVII i el XX siglo.
 

EL SEMETERIO

 
En el 1386 la Autoridad de Venezia otorgó a los djudiós un terreno en el Lido, para ke se aga semeterio djudió. La mas antika lapide data del 1389.
De las semples piedras ke kuvrían las primeras tombas, se pasó a tombas mas emportantes, después del arivo de los djudiós sefaradís, ke venían de la peninsula íberika. Se veyen sovre las tombas símbolos i títolo de nobleza, símbolos djudiós (manos bindizientes, ets.) i sinyos de las sivdás de provenensia. A la fin del XVII las tombas se azen sarkofagos kon dekorasiones. Del 1700 se pasó al Cimitero Nuovo ande vienen enterrados los djudiós de Venezia. El semeterio djudió se topa ayá asta muestros días, i para alkansarlo se deve uzar el “vaporetto”.
En el 1929 la munisipalidad de Venezia eksproprio una parte del semeterio, para azer una kaleja. 300 tombas devieron ser kitadas. Durante las eskavasione se topo ke avian dos kates de tombas, del kual el sigundo era despuesto en orden kronolójiko. Asta oy fueron katalogadas serka de mil lajas i fragmentos, por la mas parte apartenientes a los siglos XVI i XVII, de famiyas djudías ke se fuyeron de la Espanya i del Portugal. Munchas de estas famiyas pudieron mantener, malgrado las persekusiones, sus rikezas, i enriva de las lajas de veyen blazones de nobleza kon leones, ágilas, torres, koronas, ets. Las eskritas son en ebreo, ma ay algunas en ebreo i espanyol o portugez, o ebreo i italiano.
Son enterrados aya famozos rabinos, la poetesa Sara Copio Sullam, Leone da Modena, ke fue el autor de algunas de las mas ermozas inskrisiones tombales. Se veyen sovre las tombas las alkunyas de famiyas espanyolas i portugezas, komo: Aboab, Valensin, Caravalho, Pappo, est.
 

LINGUA 

La lingua portogheze se izo en el diisején siglo otrotanto familyar komo el italiano. Los epitafios en los tombas vinía eskritos en espanyol. El dialekto venesiano ke kontiene formas ke mos yevan al espanyol i mizmo, ay ken dize, de djudeo-espanyol. 
EMPRIMERIA
 En Venezia viene fondada una emprimería ebrea, por inisiativa de Daniele Bomberg, flamingo, no-djudió, ke publikó la edisión integral del Talmud Bavlí i del Talmud Yerushalmí, i tres edisiones de la Biblia rabínika kon el komento (masorá) mayor i minor. Otras emprimerías enfloresen entre el 1500 i el 1600: Bragadin, Giustiniani, Gara i Vendramin.
El 12 de agosto 1553 el Papa Giulio II ordenó la kemadura del Talmud, i un shabat, por orden del Consiglio dei Dieci se kemaron en un fuego en Piazza San Marco todos los livros de sujeto talmúdiko. Otros livros ebreos fueron kemados en el 1568. Después fue otorgada la permisión de publikar livros ebreos, previa sensura.
  
MUZIKAEntre el 1400 i el 1700 los djudiós de Mantova, Venezia i Ferrara empesaron a dezvelopar “Le nuove musiche”. Sikomo eyos estavan serrados getos, las muevas múzikas toparon sus lugar en las sinagogas. En Venezia avía una entera orkestra. Rabí Leone da Modena se disho favorable a el establesimiento de un koro en Ferrara. Kuando en el 1605 los venesianos le demandaron si era admisible de meter un koro en la sinagoga, él respondió afirmativamente, defendiendo el kanto litúrjiko kon fuersa, mientres los mas konservativos en la komunitá estavan kontrarios. Modena era amigo del kompozitor Salamone Rossi, ke él apoyó kon fuersa. En el 1623 Rossi publikó kon el ayudo de Modena su prímera koleksión de kantes korales de sinagoga Hashirim Asher Le-Shelomoh, i kon una entroduksión de Modena. En Simhat Torá del 1628 un koro kantó el kante de Rossi en la sinagoga sefaradía de Venezia, sulevantando una grande kontroversia. 
I el bayle tuvo una grande difuzión entre los djudiós de Venezia. Uvieron eskolas de bayle, ande los djudiós se topavan i kon los kristianos. En el1643 las autoridades de Venezia ordenaron de serrar todas las eskolas de kanto i de bayle, tenidas por los djudiós, pena la djezá de 500 dukados.
En el 1697 fue defendido de tener en kaza maestros de bayle, para enstruir las ijas antes i después del kazamiento.
 

REFLANES 

Hazirut de Bayonne
De Ancona no viene cosa bona
 
 
 

PERSONAJES 

DON ISAAC ABRAVANEL  Statista, apolojista i ezejeta. Nasió en Lisbona en el 1437 i murió en Venezia en el 1508. Don Isaac Abravanel, fu trezorero de Alfonso V de Portugal asta el 1481. Esto provokó el antisemitizmo kontra de él. En el 1483 se fuyó a Castilya, akuzado de konspirasión por Joan II. Del 1484-92 estuvo al servisio de Ferdinando i Isabela. En el 1492 fue ekspulsado kon todos los djudiós. De Napoli pasó a otras sivdades en Italia, asta ke en el 1503 vino a estableserse a Venezia Akí el viejo statista i filozofo pasó los últimos anyos de su vida, gozando de la estima de los governante de Venezia, i eskriviendo algunas de sus ovras mas sinyifikativas. El estava aprontado un tratado entre la Republika i el reynado del Portugal, ke nunka fue eskapado. 
DONA GRASIA NASI Beatrís de Luna, el nombre sekreto de la kuala era Grasia, nasió en el 1510 en Portugal, ande su famiya Nasí se refujió después de la ekspulsión de la Espanya. En Portugal los djudiós fueron forsados a konvertirsen. La famiya de Beatrís apartiene a la primera jenerasión de marranos, komo los neo konversos vinían yamados kon despresio. Ma Beatrís, mizmo profesándose kristiana, fue edukada sekretamente al djudaízmo, ke eya segirá. A 18 anyos se kazó kon Fransisko Mendes, ke se okupava de importasión de espesias en skala enternasional. En el 1936 su marido se murió i eya fue forsada a salir de Portugal, porké ayá fue enstituída la Enkizisión.
Eya arivó, antes a Anversa ande etava su kunyado, ermano del marido, ke se murió i él en el 1543. La Enkizisión la persige kontinuamente, porké kere meter mano sovre la grande rikeza, ke eya administra. Eya ariva a Ferrara kon toda su famiya, ande torna a su verdadera identidad. Akí Ercole II en el 1550 le da un salvakondukto ke le permete de bivir sigún “li instituti de la legge da hebreij”.Dona Grasia bive akí un periodo produktivo, aze publikar una Biblia en lengua Espanola en dos edisiones, para djudiós i para kristianos (1553). Promuove un enkontro se sima entre los rabinos italianos sovre kestiones de liturjía ebrea. Ma i de Ferrara devrá fuyirse a kavza de la peste, sovre la kuala echaron la boz ke fueron los marranos, vinidos del Portugal ke la difundieron. En el 1553 eya se fuye kon su famiya a Venezia.
La ermana de Dona Grasia, Brianda, keriendo apatronarse de toda la rikeza, la malshinó a la Enkizisión, ma eya reushó a liberarse, kon el ayudo del suvrino Joao Miguez, ke después se yamará Yosef Nasí. El se kazará kon la ija de Grasia,  i el Sultán Suleyman il Magnifico, lo ará duke de Naxos.
En el 1955 el Papa Paulus IV publika su Bolla Cum nimis absurdum (ver GHETTO). Ma Dona Grasia ya está kon su famiya en Costantinopla, ande bivrá kon luso i rikeza, protejada por el Sultán. Eya no se ulvida de sus korelijionarios, i kuando vienen kemados en Ancona 24 marranos, eya organiza el boykot del porto de la sivdá por ocho mezes. En el 1558 se akorda kon el sultán de merkar la sivdad de Tevariá en Eretz Israel, para fondar un estado djudió. El plan reushe, se empesan a azer lavoros de renovamiento en Tevariá, ma el konflikto entre Constantinopla i la Italia mete fin a la tranzaksión.
Eya konstruye en Konstantinopla i en Selanik grandes eskolas talmúdikas i rabínikas. En Costantinopla fue fondada una sinagoga, yamada “La Senyora”, en su memoria.
 
LEONE DA MODENA Rabino venesiano (1571-1648), fue un darshán aklamado en las sinagogas i apuntado komo exemplo por los papazes en las kilisias. Fue un maestro ilustre en la Torá, una autoridad en Sheelot Uteshuvot, i un intelektual avierto a la kultura de su tiempo. El eskrivió su autobiografía, Vita di Yehudà, ande dezveló el profundo kontrasto ke karakterizó su vida: de una parte su fey profunda en la Torá, i de la otra sus sintimientos de kulpa por no poder aderir kompletamente a las reglas en las kualas kreye. Meldando su livro, se veye komo el demonio del djogo ruinó su vida, porké le mankava siempre dinero para bivir, i a la fin se bozeó kon su mujer, ke ya estava kansa de este marido ke pedría siempre enormes sumas de dinero. El se okupó i de múzika litúrjika (ver MUZIKA). Leone da Modena reprezenta el trait d`union entre la tradisión rabínika serrada i la dimensión mutable de la sosiedad del 1700. 
SARA COPIO SULLAM Poetesa djudía, ke nasió i  bivió entre el diisején i el diisetén siglo en el geto de Venezia. Djoven, ermoza, blonda, palida i enamorada de la poezía, eya fue yamada “La bella ebrea” i de los no-djudiós. La produksión poétika de Sara Copio Sullam nase de su dezeo de alkansar la fama en el mundo literario, para kompensar en esta manera el estado de inferioitá, ke sufrió komo mujer i komo djudía, enserrada adientro de las puertas del geto, i romper ansí las paredes de la segregasión. Eya supo fundir en su poezía i en su Manifesto la poezía de su tiempo i la tradisión de sus padres. Los repetidos invitos a la konversión la forsaron a trokar su poezía en arma de defensa del djudaízmo en un mundo ande no avía manera de entender las razones uno del otro.
 
SIMHA SIMONE  LUZZATTO de famiya ashkenazía, nasió en Venezia en el 1583. A 20 anyos ya resivió el títolo de rabino. A la muerte de Leone da Modena resivió el títolo de rabino de Venezia. Fue un grande talmudista, i konosía profundamente la matemátika. Sus eskritos son todos en italiano. El sostuvo ke los djudiós de Venezia pueden ir al kal en gondola. Era un riformista. 
 

MESIANIZMO

 
La kestión de David Reuveni. En el 1524 ariva del Oriente David Reuveni, ke dize de ser mandado por su ermano, rey del trivo de Reuvén. El ariva sovre un kavayo blanko, tiene una spada i se prezenta al Papa Clemente VII i le propone de armar los djudiós para la konkista de la Palestina. Clemente VII lo manda kon una letra de prezentasión al rey de Portugal. David Reuveni aze un djiro trionfal por la Evropa i ariva en Portugal. Ayá se enkontra kon Diego Pires, ministro de rey, ke se deklara djudió i toma el nombre de Shlomó Molho. El rey lo mete en prezión, i él se serkuse en prezión, metiendo en períkolo su vida. El rey lo eksplusa del Portugal, i él va kon Reuveni ande el emperador Carlo V, para konvenserlo a salir a la konkista de la Palestina. Kuando torna en Italia los djudiós mizmos lo denunsian a la Enkizisión, i ék viene kemado bivo en Mantova. Después de pokos anyos Reuveni murió en Espanya en prezión.En el 1666 todo el mundo djudió fu arremeneado por el fenomeno de Shabetay Tzvi, i Venenzia no fue de manko. Mizmo el savio Samuele Aboab de Venezia fue tokado por esta lokura. Kuando Shabetay Tzvi abiuró i se izo muzulmano, su profeta Natán de Gaza pasó por Venezia en el 1668, para konvenser a todos ke la konversión de Shabetay Tzví era nesesaria a kumplir su misión. Ma esta vez el Rabinato de Venezia ekskomunikó a Natán de Gaza i lo mandó, aziéndolo preseder en kada komunità de una letra, ande se topava la firma de Natán mizmo, ke dezmentía sus viziones.
Mas tadre la komunità de Venezia kombatió kontro Moshé Hayim Luzzatto, poeta místiko ke tuvo tandensias mesiánikas.
Oy también ay una korriente de mesianizmo en Venezia, kon la kuala se enkontran todos los turistas djudiós del mundo, ke arivan a Venezia. En Venenzia ay una “Bet Habad”, ke vende livros i aze propaganda, i un restorante, dirijido por Ramy Banin, un italiano ke se izo fervente de Lubavich.

FOLKLOR 

Un uzo ke está entre el kulto i el folklor es la manera de azer (o mijor de resivir) la birkat koanim, ke es semejante en todas las sivdades italianas, ma es diferente de las otras etnías djudías.
A la ora de la birkat Koanim se aunan todos los miembros de la famiya debasho del taled del padre o del nono. Las mujeres i las ijas abashan de la ezrat nashim i se meten i eyas debasho del taled a tomar la berahá. Esto se veye en manera partikolar i ezmoviente en la Neilá de Kipur, ande i miembros de la famiya ke ya no son djudiós vienen a tomar la bindisión del shefe de la famiya, una vez al anyo. Uvieron rabinos ke se opozaron a este uzo, por la partisipasión de las mujeres en la parte de los ombres del kal. 
 
LITERATURAKonosemos las poezías de Sara Copio Sullam, ke tenía un salón ande partisipavan endjudntos djudiós i no-djudiós.
Salomone Usque (Duarte Gomez), refujiado del Portugarl, eskrivió i izo reprezentar en el 1531 el drama “Ester”, ke fue dado otras dos vezes, el 1559 i en 1592.
Leone da Modena eskrivió el drama orijinal “Rachele e Giacobbe”.
Bendetto Luzzatto eskrivió “L`amor possente”, ke no tiene nda de djudió, ma demonstra ke en el geto avía amor por el teatro. Parese ke avía una kompanía teatral stable kon ombre i mujeres, koza ke tuvo la opozisión de los relijiozos.
En muestros días topamos la komedia en lingua lokal de Venezia “Quarant`anni fa” de Polacco, 1972. 
 

KUZINA 

Antes de todo se deve akodrar ke en Venezia avía una muy antika fábrika de masá. Asta ke arivó la masá friable de Erets Israel, era la masá de Venezia ke se uzava para Pésah. Era una masá godra i dura, echa a resha.
Era difisl de mashkar, ma dava satisfaksión en el aprontar la kumida.
Otra koza karakteristika eran dos dulses famozos para Pésah: impade, una pasta brizé, reyena de almendra molida dulse; i bisse, biskochos aromatizados de kashka de limón. Estos dulse se azían kon arina paskual.
La verdá es ke ken tenía la recheta de eyos, no la dava a digunos.
I oy se venden en patiserías no-djudías, kon el títolo de “Dulses djudiós”, sin ser kasher.
 
BOLLO   BOLO
 
MASAS DULSES
 
HALLA
 
HAROSET VENEZIANO
 
Otras rechetas resiví en Venezia de ken vino de Ejipto:
 
ORABEYA
 
TRAVADOS
 
BIMUELOS DE PESAH
 
BURRIKITAS DE KALAVASA PARA ROSH ASHANA (FAGOTTINI DI ZUCCA)
 
 
 
 
 
 
 
 
 

[1]                 Pier Cesare Ioly Zorattini, Processi  del S. Uffizio di Venezia contro ebrei e giudeizzanti (1642-1681)
                   XI, Firenze, Leo S. Olschki Editore, 1993.
 

                                                                                                                                                                            
 


+ Añadir nuevo comentario
Traducciones enviadas por usted
Loading Cargando ...
+ Enviar Comentarios

לאדינו         Ladino


Artikolos de Matilda Koen Serano
      
Artikolos de Yehuda Hatsvi
    
Artikolos de Gad Nassi
  
Artikolos de Eliezer Papo
   
Sefaradi Taor

ladino
Fecha y hora
 

La Asosiasion Arkadash | Ladino | לאדינו | judeo espanyol |

אתר זה הוקם ע"י זום ייעוץ ומערכות מידע